Язлыктынъ яйнаган куьни. ТукуйМектеб авылынынъ орта мектебининъ азбары балаларга, окувшыларга толган, олардынъ колларында казгырлар, киреш
куйылган шелеклер. Мектеб бавда яс емис тереклер олтыртпага деп шунъкырлар аьпме-аьзир болган. Эм мине куллык басланды, биринши теректи экти Тукуй авыл мектебти 1992-нши йыл кутарган, сосы емис бавды эгуьв мырадын яшавга шыгарган Эльвира Кайтарбий кызы Аджибаева. Онынъ акында коьп
йылы соьзлер айтпага болады. Мектебти битирген сонъ, Ставрополь каладынъ патшалык университетинде эки диплом алган: окытувшы эм юрист. МВД органында, федераллык тармакта ислеген, университетте юриспруденция дерислерин юриткен. Ол Москва эм Стамбул калалардынъ коьмеклесуьв фондлары
ман катнасады. Ногай халктынъ фольклор эм маданият аьрекетшиси, этнограф, суьвретши, бурынгы артефактларды йыювшы, коьплеген халклар ара
конференциялардынъ катнасувшысы.
Э.Аджибаева Россияда озатаган туьрли ямагатшылык, маданият шараларда белсен катнасып юреди. Бу куьнлерде Москвада яшайды эм ногай халк тарихи мен кызыксынып, яслардынъ патриотлык сезимин тербиялав уьшин коьп куллык этеди. Онынъ атасы Кайтарбий Аджибаев бирге окыган тенъи Мутлихан Мусаева ман 9-ншы класста, алпыс йыл артта, шашкан тереклери бу куьнлерде кайдай бийик болган, бутаклары салкынлык берип, астында балалар
ойнап турадылар.
– Мен бала заманымнан алып, оьскенде мектеб азбарында бав этермен деген мырат пан яшайтаган эдим эм быйыл сол мырадымды яшавга шыгармага токтастым. Бек суьйинемен сосы эстеликли куьн соьйтип байрамшылав кепте озганына, баьри йыйылган аьдемлерге, авылымыз уьшин яны авырыйтаганларга! Аьдем оьзиннен сонъ ярык, эстеликли ыз калдырса, артык наьсип йок! – дейди коьнъилленип Эльвира Кайтарбий кызы.
Тукуй-Мектеб авылынынъ орта мектеби Ставрополь крайынынъ Нефтекум районында данъклы деп айтпага боламыз, былтыр ол оьзининъ 100 йыллык
мерекесин белгиледи. Авыл яшавшыларынынъ аьлиге дейим де эслеринде мектебти етекшилеген, «оьзи уьшин уйклап, халк уьшин туьс коьрген» баьтир хатын Мутлихан Казбек кызы Омаргазиева. Ол бу куьнге дейим де суьйикли мектебинде ислеп, оьз куьшин, билимин аямай балаларга эм яс окытувшыларга
берип турады. Бу куьнлерде болса, мектебти басшылайды. 1977-нши йылдынъ выпускниги, физика дерислерин юритуьвши Хадижат Мукав кызы Янмурзаева. Онынъ аьрекети мен мектеб тарихи Ставрополь крайынынъ Нефтекум районынынъ билим тармагында алтын арыплар ман язувлы демеге болады. Он биринши Савлайроссиялык «Уьстинлик – 2015» деген конкурстынъ дипломына тийисли болган. Хадижат Мукав кызы «Алтын кус» атлы ямагатлык баргыдынъ иеси. Савлай мектеб етимислери «Россия в лицах» деген энциклопедия ишине кирген. Балалардынъ билимин, тербиясын, усталыгын оьстирмеге сосы аьлемет меканда баьри амаллар да бар. «Савлайроссиялык Сый китабине» Тукуй-Мектеб авылдынъ 14-нши номерли мектеби кирген.
Мектебтинъ емис бавына балалар эм окытувшылар суьйип карайдылар, йыл сайын тереклерден туьрли емислерди йыйып, сатып, сол акшага керекли затларды алып турадылар. Эм мине Эльвира Кайтарбий кызынынъ коьмеги мен мектеб бавы тагы да 200 емис тереклерге толды. Куьезленеди анасы Зоя Аджибаева кызларынынъ, увылынынъ етимислерине, олардынъ тувган ерине алаллыгына, атасы Кайтарбий де сондай яныплы аьдем эди деп эскереди. Сосы куьн йыйылган эм бав шашпага коьмек эткен аьдемлердинъ ойларында эстеликли болып калаягына шек йок. Сондай окувшылар ман баьри мектеблер де оьктем болсынлар.
Салимет Майлыбаева,Россия Язувшылар эм Журналистлер союзларынынъ агзасы. Суьвретте: Зоя эм Эльвира Аджибаевлер, С. Майлыбаева.
