Янъыларда Терекли-Мектеб авылындагы Халк яратувшылык орталыгынынъ фойесинде Осман Индрали увылынынъ ызгы заман язган суьвретлерининъ выставкасы ашылды. Выставкадынъ ашылувына багысланган шатлыклы шарада отставкадагы ФСБ полковниги, ДР ат казанган ыхтыярсаклав органлар куллыкшысы Алибек Мурзаев, Ногай район администрациясынынъ аькимбасынынъ орынбасары Мурат Шадиев, художник Алавдин Абубекеров, Россиядынъ эм Дагестаннынъ ат казанган маданият куллыкшысы Нарбике Муталлапова, Терекли-Мектеб авыл аькимбасы Марат Кулунчаков, Кадрия
атындагы мектебининъ окытувшысы Фатира Магомедова, онынъ окувшылары эм район орталык яшавшылары ортакшыладылар.
Шарады Мурат Шадиев ашты, ол суьвретши Осман Суюндиковка арымай-талмай эткен куллыгы уьшин савболын айтты эм яс несилге халкынынъ маданиятын, ногай тилди, белгили аьдемлеримиздинъ яратувшылыгына сый эм кызыксынув этпеге шакырды.
Нарбике Арслановна Муталлапова окувшыларга Сраждин Батыровтынъ яратувшылыгы, онынъ тезден Москва каласында уйгынланаяк выставкасы, солай ок Осман Суюндиковтынъ бу куьнги шарасы акында айтты. Ол уьйкен оьктемлик пен бизим саны уьйкен болмаган халкымыздан зейинли аьдемлер аз шыкпаганы акында айтты. Сондай яркын инсанлардынъ бириси – Сраждин Батыров. Нарбике Арслановна бу куьнги яслар сырасында халкымыздынъ уллы
аьдемлерининъ исин бардыраяк аьдемлер болаягына сеним этти.
Алибек Мурзаев бу – бизим атайларымыздынъ эм тетейлеримиздинъ уьйлери ясалган суьвретлерге карап, биз оьзимиздинъ тамырымызга кайтатаганымызды эм куьш алатаганымызды белгиледи. Солай ок ол, йыйылганлардынъ тилеги бойынша, Франциядынъ бас каласы Парижде Сраждин Батыровтынъ суьвретлерининъ выставкасын озгарувда коскан уьйкен уьлиси акында хабарлады.
Марат Кулунчаков мектебте окыган йыллары, суьврет ясав дерисинде бир 2-3 такыйка ишинде Осман Индралиевичтинъ сызган сызыклары ярасыклы суьвретлерге айланганы акында эскеруьвлери мен боьлисти. Ол балаларга ногай халкынынъ уллы тарихи акында айтты.
Шара бойынша суьвретши Алавдин Абубекеров эм тарих сабагынынъ окытувшысы Фатира Магомедова шыгып соьйледилер. Йыйылганлар Осман Индрали
увылынынъ «Шилле», «Язлык», «Авыл», «Паркта куьз» эм баска суьвретлери мен таныстылар. Онынъ ислеринде оьз тетесининъ уьйин таныганлар да болдылар. Соьйтип, суьвретшидинъ ислери бойынша окувшылар халкынынъ тарихи мен, аьдетлери мен таныстылар.
Нурият Кожаева.
Суьвретте: шарадан коьринис.