Уьстимиздеги йылдынъ коькек айынынъ ишинде Ногай районымыздынъ А-Х.Джанибеков атындагы мектебининъ окувшылары аз уьстинликлерге
етиспедилер. Солардынъ ишинде 2-нши эм 3-нши класс окувшылары Эмир Каракаев, Салман эм Султан Аджибаевлер Россиядынъ бас каласы Москвага да
етип, катнаскан шарада савгалы орынларга да етисип келдилер.
Олардынъ етекшиси эм басларын етуьвши сол уьстинликлердинъ болувына куьш салган Гульнара Солтанхан кызы Хозбулатова болады. Етекшидинъ соьзлерине коьре, окувшылар мунда оьзлерининъ терен билиминнен баска болып, аьзирлеген куллыгын йигерли эм коьрнекли аьлде яклап та болдылар, шарага белги беруьвшилердинъ соравларына да тувра, толы явапларды бердилер.
«Тувган юртымнынъ ерли самоуправлениесининъ тарихи» деп аталган X Савлайроссиялык шарасынынъ енъуьвшилери Москва каласындагы Союзлар Уьйининъ Колонный залында савгаландылар. Бу куьнге, сондай сыйланувга тийисли болаяктан алдын, Ногай районымыздынъ билимли окувшыларына куьш салмага да туьскен. Олар баслап белгиленген шарадынъ заочный кезегин оьткенлер.
– Баьриси шарада катнаспага суьйгенлер саны айлак коьп эди. Россиядынъ 87 субъектлериннен уьш мынга ювык аьризе берилген, солардынъ 1600-
зи шарада катнаспага ыхтыяр алдылар, сондай сыйлы орын бизим окувшыларга да берилди. Куллыкларды яклав эм сонынъ презентациясын озгарувга мырсат Г.Плеханов атындагы йогары окув ошагы, РАНХиГС эм сондай коьрнекли ерлерде берилди, – дейди Гульнара Хозбулатова.
Окувшыларга энъ де маьнелиси савгалав шагы эди. Юрек телезуьвлер, оьзлери етискен етимислер мен оьктемсуьвлер…
Оьзек те, кишкей окув ошагыннан окувшылар сондай дережели ерде савгага тийисли болганлары баьримизге де куваныш эм оьктемлик аькелмей болмады. Бу ерде окувшылардынъ да, олардынъ илми етекшисининъ де талабын, окымыслыгын эм тек алдыга бармага суьйген ымтылысы барлыгын да белгилемеге керекпиз. Гульнара Солтанхан кызынынъ етимислери, окувшылар ман ислевин куьн сайын ийгилендируьви акында да аз эситпеймиз. Алдыда тек
уьстинликлер эм илми тавдынъ бийиклигине барганды йорайман. Сондай талаплы окытувшылар коьп болса, етимислерге етискен окувшылар саны да
куьннен-куьнге коьбеер.
Бу куьн окувшылар оьзлерининъ савгаларын Россия Федерациясынынъ турак-коммуналлык хозяйствосынынъ эм курылыс министрининъ орынбасары
Алексей Есько, йогары билимлендируьв эм илми министрининъ орынбасары Ольга Петрова, сенаторлардынъ, Госдумадынъ депутатларыннынъ эм
сондай власть органларынынъ етекшилерининъ колларыннан алдылар.
Шарада катнаскан окувшылар (кишкей класслардыкылар) «Артек» халклар ара балалар орталыгына путевкаларга тийисли этилиндилер, уьйкенлер
патшалык эм муниципаллык власть органларында стажировка оьтпеге ыхтыяр алдылар. «Тувган юртымнынъ ерли самоуправлениесининъ тарихи» деп аталган X Савлайроссиялык шарасында бизим ердеслер Эмир Каракаев «Эгер мен муниципаллык туьзилисининъ етекшиси болсам» деген проекти бойынша исин яклады. Эгер сол проекти яшавга шыгарылгандай болса, «Можжевеловая роща» деп аталган тыншаюв санаторий ашаягын билдирди, сол иси бойынша мунда ол проект сметаларын коьрсетти эм баьри затын да келбаклап анълатты. Салман ман Султан Аджибаевлер, эгер олар муниципаллык туьзилисининъ етекшилери болсалар, район еринде ногай тилининъ оьрленуьви уьстинде ислееклер эм соны оьрлендируьв уьшин клуб та ашаяклар.
Алдыда окувшылардынъ етимислери аз тувыл, аьр кайсы катнаскан шарасы да оларга тек етимислер аькелсин, йыллар оьтер, биз бу яслардынъ атларын аьли де эситермиз, биревлери, буйырган болса, етекшилер де боларлар.
Г.Сагиндикова.
Суьвретте: окувшылар етекшиси мен Москва каласында.