Уллы Енъуьвдинъ 81-нши йыллыгын белгилев алдында биз оьктемлик пен Аталыкты коршалавшы тукымлар акында айтамыз. Бизим элде ондай аьеллер коьп: атайы Уллы Аталык согысы фронтларында явды соккан, онйыллыклар оьтип уныгы ман немереси де СВО барысында Эл
кызыксынувларын коршалайдылар. Енъуьвдинъ асабалары сый ман ата-бабаларынынъ исин бардырадылар. Олардынъ аьеллеринде Аталыкка, Тувган ерге суьйим несилден-несилге коьшеди.
Уллы Аталык согысы аьр бир аьелде битпес яралар калдырган, миллионлаган аьдемлердинъ яшавын кыскарткан, балаларды етим эткен, аналарды аьзиз увылларыннан айырган. Бу согыс айлак коьп йойымлар эм кыйынлыклар аькелген, онынъ акында юрек сызлавсыз ойлап болмайсынъ. Совет халкынынъ согыс йыллардагы баьтирлигин мутпага ярамайды, сол эсти несилденнесилге коьширмеге керек.
Мусаби Алиев Кызыл Аьскерде оьзининъ исин юритип турган шакта, немец-фашистлери элимизге баскыпшылык этип, дав басланады. Ногай яска тек 20 яс болады. Ол кызмет кылувын Киев каласында оьтеяткан болган. Соьйтип, согыстынъ басында ок, оны аьскер йолдаслары ман фронтка йибередилер. Мусаби Инал увылы 1943-нши йылдынъ увыт айыннан алып 1944-нши йылдынъ коькек айына дейим Куьнбатар фронтында взвод командири болып ислеген. 1944-нши йылдынъ коькек-казан айларында Украин фронтында мергин взводынынъ командири болган.
Аьскерши Мусаби Инал увылы «За отвагу», «Уллы Аталык согысында Германияды енъгени уьшин» медальлери мен савгаланган. Крымская авылын алган мезгилде, ногай ястынъ взводы явдынъ уьш пулемет расчетын йок этип, соны ман мергин подразделениелерге белгиленген авылды алмага йол ашкан. Мусаби Алиев Енъуьв мен уьйине 1945-нши йыл кайткан. Ветераннынъ тувдыклары да аьскер йолын сайлаганлар. Бу куьнлерде онынъ уныгы Рустам эм немереси Ренат Алиевлер согыс спецоперация барысында аьскер борышларды толтырадылар.
Рустам Алиев Сырт флотында сувдынъ астындагы атомлы кемеде кызмет кылувын оьткен. Аьскерден сонъ Иш ислер министерствосынынъ спецбоьлигинде ислеген,
сол шакта Элимиздинъ энъ де абырайлы йогары окув ошакларынынъ бирисинде билимин оьстирген.
Ногай йигит Сырт Кавказ еринде оьткен согыс оьзгерислерде катнаскан, Украинадагы спецоперацияда басланган биринши куьнлерде ок сонда ортакшылык этеди. Россия Аьскерининъ офицерининъ эрклиги «За ратную доблесть», «За участие в СВО» медальлери мен белгиленген, солай ок ога «За отличие в охране общественного порядка» РФ патшалык савгасы тапшырылган. Рустам Алиевтинъ эрклиги акында онынъ кардаш-тувганлары аьскер йолдасларыннан эситедилер. Йигерли эм сулыплы офицер топлар атув болган заманда аьскершилерди куткарган, яралы аьскер йолдасларын кавыфсыз ерге шыгарган. Сондай йигитликлерди офицер баьтирлик тувыл, борыш деп санайды.
Уьйкен атайынынъ эм атасынынъ аьскер йолы Ренат Алиевке де коьрим болган. Ногай яс Минеральные Воды каласында тувыпоьскен. Мектебте окыган йыллардан алып спорттынъ бокс эм эркин куьрес кеплери мен кызыксынган, туьрли базласларда енъуьвши де болган. Мектебти окып тамамлап, яс Москва коьппрофильли колледжининъ филиалында, сонъ Москва финанс-юрист институтынынъ Пятигорсктагы филиалында окувын бардырды. Кызмет кылувын Пятигорскта спецназ боьлигинде оьткен. Аьскерден сонъ ОМОН-га куллыкка туьскен. 2025-нши йыл РФ Коршалав министерствосы ман контракт беркитип, согыс спецоперация озып турган ерге йолланган.
Ренат Алиевтинъ юрегининъ тоьринде эли мен бирге ногай халкы да турады. Ол балалай халкынынъ тарихи мен кызыксынган, ата-бабаларындай болып, атларды
бойсындырып болады. Ренаттынъ баска миллет ваькиллери сырасында бек коьп дослары бар, ол Россиядынъ куватлыгы халклар тыпаклыгында экенин анълайды.
– Россия Президенти Владимир Путин Украинада согыс спецоперация басланувы акында билдируьв эткенде, Элди коршалав ман байланыслы ой мени бир куьн де
калдырмады. Меним уьйкен атайым – Уллы Аталык согысынынъ ветераны, атам – СВО катнасувшысы, меним де йолым олардынъ арты ман ызламага. Аьли де, 1941-нши йылдагындай болып, эр йигитлер Элин эм оьз аьелин коршалайдылар. Бизим уьйкен атайларымыз элимизди нацистлерден куткарган, эндиги бизим шерет явды енъмеге,
– дейди Ренат.
Алиевлердинъ аьелининъ тарихи эрклик, баьтирлик, борышына намыслы карав, соьзлери мен тувыл, ислери мен Аталыгына алал аьдемлер акында тарих болады.
Нурият Кожаева.
Суьвретлерде: Уллы Аталык согысынынъ ветераны М.Алиев, онынъ уныгы эм немереси Рустам эм Ренат Алиевлер.
