Янъыларда Карагас авылында СВО барысында янын берген Фарид Джумагишиевтинъ эстелигине мемориаллык такта ашылды. Белгиленген шарада «Аталык коршалавшылары» фондынынъ координаторы А.Межитов, ДР Ямагат палатасынынъ агзасы, район Хатын-кызлар советининъ председатели Асият Манкаева, К.Кидирниязов атындагы Карагас авыл мектебининъ етекшиси Н.Шураева, С.Батыров атындагы саниятлар мектебининъ окытувшысы Мархаба Шалиева, ногай шаири Салимет Майлыбаева, окытувшылар, окувшылар, авыл яшавшылары эм баьтирдинъ ювык кардашлары ортакшыладылар. Мемориаллык такта салувдынъ баславшысы Ногай район администрациясы болды.
Шара РФ гимни мен басланды. СВО катнасувшысы Фарид Джумагишиевтинъ аьскер йолы акында ТОКС отрядынынъ катнасувшысы, республикалык конкурсынынъ савгашысы Альяс Карайдаров хабарлады. Сонъ сыйлы конаклар эм баьтирдинъ ювыклары шыгып соьйледилер.
Олардынъ кайбириси Фарид Джумагишиев – эркликтинъ эм шыдамлыктынъ уьлгиси экенин белгиледилер. Ювыкларынынъ эм окытувшыларынынъ соьзлери мен, ол ийги, ярдамга дайым аьзир окувшы эм суьйимин аямай савкатлаган ата эм увыл болган.
Фаридтинъ яркын эстелиги эм атын мемориаллык тактага язып, оьмирлеткенлери уьшин Джумагишиевлердинъ аьели атыннан разылыкты С.Межитова билдирди.
Мемориаллык тактасын ашпага сыйлы ыхтыяр Афган согысынынъ ветераны Идрис Межитовка, Фаридтинъ анасы – Рахия Залимхановнага, онынъ агасы Джафарга эм шарадынъ
конакларына берилди. Йыйылганлардынъ юреклерине етти Фаридтинъ досларынынъ баьтир акында эскеруьвлери мен боьлисуьвлери, ДР ат казанган артисти Зульфия Аджигиримовадынъ йыры, Альбина Джамаловадынъ ятлав яттан айтувы.
Биз яс янларын Эли уьшин аямаган баьри йигитлерди эсимизде саклаймыз!
Н.Кожаева.