Тыншаюв болжал – согыс спецоперациясынынъ катнасувшысына бек уьйкен савга. Уйкысыз туьнлерден, рахатлы куьнлерден сонъ сол шак бир аьлемет еннет болып коьринеди. Сол берилген мырсатты да оьзлерине багысламай, дав майдандагы йолдасларды, олардынъ акында ойланатаганлар да аз тувыл. Сондай навасыз яслардан болады согыс
спецоперациясынынъ катнасувшысы, контрактлы ис аьрекетти бардырувшы Эсманбет Хасанбий увылы Уразаев. Онынъ акында бизим газета бетлеринде язылган, ол бизим аьдетли йолыгысларымыздынъ бирисинде ортакшылык та эткен, солай болганда мен оны ман ювык таныс деп те айтпага боламан. Биринши караска, бек каьмбил эр киси, турысы да оьзине каратады, кыскаша, мен сол эр кисиде шынты аьскершиди коьрген эдим.
Онынъ бу куьнги эткен иси мени боьтен де суьйиндирди, неге десе оьз ойымда ога йогары баа бергеним, аянланды. Ол айлак кыска болжалга уьйине, аьели мен коьрисуьвге келгенде, дав майданда калган йолдасларына да пайдалы оьткермеге куьшин салды.
Согыс спецоперациясынынъ катнасувшысы болып, ол оьзи сонда басланган куьнлерден алып аьрекетин бардырады десем де, оьтирик тувыл, дав майданда аьскершилерге не керегин бек аьруьв биледи, оьзинде керекли затларды йыйнап, алып кетпеге амал болганда, сол борышты мойнына алып, толтырмага баьри куьшин де салды. Оьзининъ ювыклары эм кайын юрты ман косылып, баслап акша йыйнады, сол карыжды курылыс алатлар алувга да кулланды.
– Алдышылыкта куьн сайын болмаса да, тез-тез блиндажларды янъыртып турмага керек болады, сога курылыс алатлар коьп кетеди, аьли меним сизге тилегим де сол,
колымыздан келгенди этейик, – деп ол оьз тилегин тайпа-тамыры арасында яйды.
Аьскершидинъ тилегин баьри ювыклары да кабыл этип алды эм аьр кайсысы да оьзининъ материаллык ярдамын этти, ол СВО ерине келген юкли автокоьлигин толтырып, курылыс алатлар аькетти.
Оннан баска болып, Ногай районымызда аьрекет бардыратаган «Неравнодушные сердца» волонтер куьбиннен де ога коьмек болды. СВО ерине сол куьптинъ агзалары ман аьзирленген юзлеген шилтерлер кеткени белгили, бу йол да олар сол алал коллары ман аьзирлеген шилтерди Эсманбетке де тапшырдылар.
Алдышылыкка курылыс алатлар ман, шилтерлер мен ногай еримиздинъ йылувлыгы да кетти деп айтпага ыхтыярымыз бар, неге десе аьр бир аьзирленип йиберилетаган гуманитарлык юк пен сеним, суьйим эм яркын келеектегиге ынанув да кетеди. Аьр кайсы хатын да шилтердинъ бир байламын этип, аьскерши-увылларга тек ден савлыкты йорайды. Баскалай болып та болмайды. Аьр кайсы аьскерши- коршалавшы биревдинъ белиннен тувган алал баласы, сыйлы аьел басы…
Аьлиги заманда Эсманбет Уразаев ерине еткен, курылыс алат та, белки, кулланылган да болар, оннан бизим юртка видеосюжет аркалы келген разылык соьзлер аьр кайсымызга да йылувлык аькелди.
Уьшинши гаубичный артиллериялык батареясынынъ етекшилеви аьскерши Хазардынъ (Эсманбеттинъ шакырув аты) тувган кардашларына, Ногай районынынъ
волонтер хатын-кызларына ак юректен разылыкларын билдиредилер, ден савлыкты эм тынышлы аспан астында яшав оьмирди бардырганды йорайдылар.
Бу тарих – коьримли, сол аркалы биз тыл алдышык тувыл ма деген ойга да келемиз, аьдемлер (яс болсын, ясуьйкен болсын) дав майдандагы аьскершилердинъ тоьгерегинде бирлеседилер, явга карсы шыгув тувыл ма сол?!
Уразаевлердинъ тукымы эм Ногай районымыздынъ яшавшылары ийги коьрим болып, кыска болжаллы тыншаюв да стратегиялык маьнели болмага болатаганын ыспатладылар. Согыста, кыйынлыкта ювыклардынъ колтыклавы болса – энъ де сенимли савыт.
Галима Курганова.
Суьвретте: 3-нши гаубичный артиллериялык батареясынынъ етекшилеви разылык билдирген шакта.