Коькек айынынъ ызгы куьнлеринде «Шоьл тавысы» республикалык газетасынынъ редакциясында Дагестан Республикасынынъ Язувшылар союзынынъ ногай секциясы ман биргелесте «Шоьлдинъ талаплы кызы» деп аталган яттан ятлав окувшылар конкурсы оьтти. Ярыста белгили ногай язувшысы, драматургы, публицисти, Россия ат казанган маданият куллыкшысы, Сулейман Стальскийдинъ баргысынынъ лауреаты Бийке Исхак кызы Кулунчаковадынъ ятлавларын Ногай районынынъ мектеблерининъ 5-8-нши классларынынъ окувшылары окыдылар. Конак болып шарада ногай халкынынъ данъклы шаир кызы Бийке Кулунчакова ортакшылык этти. Жюри сырасында «Шоьл тавысы» республикалык газетасынынъ яваплы секретари, ДР ат казанган маданият куллыкшысы Любовь Уразаева, газетадынъ боьлик редакторы, шаир Магомет-Али Ханов, Карагас авылынынъ мектебининъ ана тил окытувшысы, шаир Салимет Майлыбаева, Ногай районынынъ Билимлендируьв управлениесининъ куллыкшысы Нурбике Кельдасова катнастылар.
Шарады ДР Язувшылар союзынынъ ногай секциясынынъ етекшиси Гульфира Бекмуратова ашты. Ол Бийке Исхак кызына бу шарага келгени уьшин разылыгын билдирди. Кутлав соьзлер мен «Шоьл тавысы» республикалык газетасынынъ бас редакторы, согыс аьрекетининъ ветераны Эльмира Кожаева шыгып соьйледи. Ол язувшыды келеяткан мерекеси мен кутлап, онынъ тек ногай адабиятынынъ тувыл, савлайроссиялык эм савдуныялык адабиятынынъ оьрленуьвине коскан уьйкен уьлисин белгиледи. Конкурс катнасувшыларына уьстинликлер йорады.
Конкурс эки кезек болып оьтти. Тоьрешилер аьдиллик пен иследилер, аьр бир катнасувшыга тийисли баа берилди. Окувшылар яваплылык пан конкурска караганы белгили эди.
Баьрисин де оьзининъ ийги окувы ман ЧервленныеБуруны авылынынъ мектебининъ 2-нши классынынъ окувшысы Эльвина Нурлубаева сукландырды. Ол кайтип ийги этип Бийке Кулунчаковадынъ «Ойнай, домбырам, ойнай» деген ятлавын окыды.
5-6-ншы класслардынъ арасында биринши орынды Карагас авылынынъ орта мектебининъ 5-нши классынынъ окувшысы Айдан Агабалаева алды. Экинши орынга Темирлан Аджигайтаров (Карагас авылы) эм Эльза Кулушова (Кумлы авылы) тийисли болдылар. Эки уьшинши орынды тоьрешилер Айзана Абубекеровага (Орта-Тоьбе авылы) эм Аделия Аджиниязовага (Червленные Буруны авылы) бердилер. 7-8-нши класслардынъ арасында биринши орынды Аиша Алыпкашева Кадрия атындагы мектеб) алды, экинши
орынларды Зарипат Абдулкеримовага (Ленин авылы) и Ясмина Эдильбаевага (Нариман авылы) бердилер, уьшинши орынларга Сабрина Абдулгапарова (Кумлы авылы) эм Азима
Камашова (Куьнбатар авылы) тийисли болдылар. Баьри катнасувшыларга Сый грамоталар эм «Байтерек» журналлар савгаландылар.
Енъуьвшилерге китаплер эм дипломлар тапшырылды. Конкурс катнасувшылар Бийке Кулунчаковага соравлар бердилер, оларда адабият аьрекетшиси мен хабарласпага, оны ман суьвретке туьспеге амал бар эди.
Бийке Исхак кызы Кулунчакова балаларга конкурста катнасканы уьшин савбол айтты, окытувшыларга оларды соьйтип ийги этип аьзирлегени уьшин эм шара уйгынлавшыларга
разылыгын билдирди.
Язувшы ман йолыгысты саьбийлер яшав бойынша эсинде саклар деп ойлаймыз. Соьйтип, йылы аьлде оьтти Ногай районында ана тилин саклавга эм таралтувга каратылган тагы да бир шара.
Г.Бекмуратова.
Суьвретте: Б.Кулунчакова конкурстынъ энъ де яс катнасувшысы Эльвина Нурлубаева ман.
