Янъыларда Ногай районынынъ халк яратувшылыгы эм маданият оьрленуьв орталыгында «Биз баьримиз де туьрли болсак та, биргемиз» деген Россия халкларынынъ Бирлик йылына багысланып район бойынша балалар биюв коллективлерининъ йылсайынлык фестивали шатлыклы аьлде оьтти. Балалар биюв коллективлерининъ фестивали ДР
ат казанган маданият куллыкшысы, методист Нина Халиловадынъ уйгынлавы ман озгарылды. Фестивальди Дагестан Республикасынынъ ат казанган артисти Зульфия Аджигеримова ашты эм юритти. Туьрли туьсли миллет кийимлери, оьнерли яс биювшилердинъ ярасык биювлери сол шарады шынты байрамга айландырдылар. Районда балалардынъ биюв саниятын оьрлендируьв, ога ымтылысларын белсенлетуьв, талаплы саьбийлерди биювге аьвликтируьв, янъы яратувшылык оьнерлерин аянлав эм оларды коьтергишлев сол шарадынъ бас мырады болды. Шатлыклы биюв фестивалинде оннан артык авыл маданият уьйлерининъ биюв куьплери туьрли ярасык миллет кийимлеринде Россия халклар биювлерин ортага шыгарып коьрсетуьвлери мен ярасыкладылар. Солай болып, шарада ортакшылык этпеге «Карлыгаш» биюв ансамбли (етекшиси А.Тунгатарова) эм «Юлдызлар» биюв коллективи (етекшиси Р.Елакаева) шакырылган эдилер. Шара барысында туьрли куьп катнасувшылары туьрли жанрлы биювлери мен шыгып, оьз оьнерлерин коьрсеттилер. Айтпага, олар Бораншы авылыннан «Ак шобан» биюв ансамбли (етекшиси А.Боршакаева) «Домбыра» ногай миллет биювин, Кумлы авылыннан биювшилер куьби (етекши А.Аджибатырова) «Заман» биювин, Куьнбатар авыл куьп катнасувшылары (етекшиси С.Мусаева) цыган миллет биювин, Эдиге авылыннан биювшилер куьби (етекшиси А.Шатемирова) орыс миллет биювин, Батыр-Мурза авылыннан ансамбль (етекшиси А.Ваисова) «Матушка Земля» биювин, Карасу авылыннан биювшилер куьби (етекшиси К.Аджиманбетова) ингуш миллет биювин, Орта-Тоьбе авыл маданият уьйиннен «Юлдызлар» куьби (етекшиси З.Оразова) бурынгы орыс миллет биювин, Червленные-Буруны авылыннан биювшилер куьби (етекшиси А.Байгазиева) «Степные зори» туьрк миллет биювин, Нариман авылыннан «Айданак» ансамбли (етекшиси Э.Суюндикова), Карагас авылыннан «Лашынлар» ансамбли (етекшиси А.Аблезова) лирикалык биювин эм сондай баскалар коьрсетип катнастылар. Байрамнынъ сонъында фестиваль катнасувшысы болган аьр бир биюв куьби Сый грамотасы эм статуэткалар ман белгилендилер. Ногай районынынъ халк яратувшылыгы эм маданият
оьрленуьв орталыгынынъ етекшилеви районнынъ баьри авыл аькимбасларына да оьз биюв коллективлерин байрамга еткеруьвде коьтергишлеви уьшин разылыгын билдиреди.
Сол озгарылган туьрли туьсли фестиваль, йогары коьнъилде оьтип, оьнерли саьбийлерин аянламага, халкымыздынъ саниятын оьрлендирмеге, оьсип келеятырган аркады миллет
маданияты, аьдетлери мен ювык таныстырып, олардынъ кишкей юреклеринде биювге энген суьйим оьркенин берк тамырластырмага амал берди.
Г.Нурдинова.
Суьвретте: шарадан коьринис.
