Аьдемнинъ яшавындагы аьр бир шак аьлемет: балалык бал татыйды, яслык йоллар ашады, мыратлар тувдырады, яс заманда аьдем аьел курып, белсенли аьрекетин бардырады.
Терекли-Мектеб авыл яшавшысы Гульнара Беккишиева яны суьйген иске савлайын оьзин багыслап, балаларынынъ, уныкларынынъ куьезине суьйинип турады.
Гульнара Беккишиевадынъ бала эм мектеб йыллары Батыр-Мурза авылында коьпбалалы Мауш эм Куьнбике Шандаковлардынъ аьелинде оьтти. Сол йыллар акында энъ де йылы
эскеруьвлерин хатынкыскаяклы оьз юрегинде бу куьнлерде де саклайды. Аьр бир бала кимик онынъ да оьз мырадлары бар болган: медсестра болып ислеп, халкка ярдам этпеге эм савда юритпеге. Яс кыскаяклы тувган ерине кайтып, белин каты бувып, эндиги савдага урынып куллык этти. Ол баслап аяк кийим, сонъ хатынлар кийимин сатты, оннан сонъ ногайдынъ тойына керекли болган затлар аькелди. Бир куьн де куллыктан коркпады, оьз куьшине сенди, аьели эм ян йолдасы ога дайым тирев болды, биргелесип алал кыйыны ман дуныя да курдылар. Соны ман бирге Гульнара Беккишиева район больницасынынъ балалар боьлигинде, оннан сонъ Ногай район КЦСОН-да коьп йыллар медсестра болып иследи. Куллыгына мукаятлыгы ман ис йолдаслары эм авыл ясуьйкенлери сырасында сый-абырай казанды.
Бир неше йыл артта, Гульнара Беккишиева «Ак гуьл» агентствосын ашкан. «Ак гуьл» куллыкшылары Гульнарадынъ етекшилеви мен тойларга ярасык сыпыралар курадылар. Оннан оьзгелей, ол оьзин хатын-кызларга, выпускниклерге, Ана куьнине кешлик-байрамлар уйгынлав исинде де сынап караган. Гульнара Маушевна озгарган кешликлерде ортакшылап, бизим ногай шаиримиз Салимет Майлыбаева оьзининъ ярасык эм йылы соьзли сыдыраларын да «Ак гуьл» етекшисине багыслаган.
Предпринимателькыскаяклы саваплык этпеге де бир де мутпаган. Ол студент йылларында больницада ислеген заманда, онда эмленген етим балаларга колыннан келген коьмегин этпеге шалыскан.
КЦСОН-да ислеген йылларында да, бу куьнлерде де колайсыз яшаган аьеллердинъ балаларына куваныш савкатлап, савгалар элтейди. «Ер маьлиеклери» проекти бойынша сакат балаларга оьз атыннан сыпыралар курган заманы да болды. Сонынъ уьшин Г. Беккишиевага сол замандагы район администрация аькимбасынынъ орынбасары Б.Ярлыкаповтан
Разылык хат тапшырылган. Кайратлы кыскаяклы кайсы баслаган исин де, кыйын деп бир де коймады.
Аьелиндеги, киели ана эм тандыр саклавшы борышын да, ол ийги этип толтырды. Ян йолдасы Тимур ман бирге эки кеде эм ялгыз кыз оьстирип, яшав йолына салдылар. Уьйкен увылы Арслан оьз аьели мен элимиздинъ Сырт яктагы калаларында савда исин юритеди, оны бизим район яшавшылары Ногай патшалык театрынынъ уста артистлерининъ бириси деп эсинде сакламага боладылар. Экинши увылы Руслан Москва каласында «Федеральный центр мозга и нейротехнологий» больницасында врач болып ислейди.
Азизат кызы да, анасынынъ йолы ман барып, медучилищеде окыган.
Олар баьриси де оьз аьеллерин курып, балаларын оьстиредилер, оьз уьстинликлери мен ата-анасын кувандырадылар, салган кыйынын аклайдылар.
Ногайда «онъганнынъ эки яхшылыгы бир келер» дегенлей, тезден Гульнара Беккишиева предприниматель куьнин байрамшылаяк. Янъыларда болса ол оьзининъ 60 йыллык мерекесин аьзиз аьели, балалары, ювыклары, дослары тоьгерегинде бек йылы белгиледи. Эне солдыр уьйкен шынты наьсип!
Н.Кожаева.
Суьвретте: Г.Беккишиева.