Аьр бир аьдемнинъ мырады болады. Сондай мырат Джанибеков атындагы мектебтинъ 2-нши классынынъ окувшысы Эмир Каракаевте де бар.
Ол оьзининъ элин келеекте ярасык, онъайлы, тынышлы этип коьреди. Буьгуьнлерде болса, яс ердесимиз мектебте окып, берк билим алады.
Онынъ суьйикли окув сабаклары – ана эм орыс тили, адабият, окружающий мир. Эмир бек суьеди окымага, янъылыкларды билмеге, уьйренмеге ымтылады, солай ок спорт пан кызыксынады.
Ол шатраш эм футбол ойнамага суьеди.
Янъыларда Москва каласында «Меним тувган еримнинъ ерли самоуправлениесининъ тарихи» Савлайроссиялык конкурсынынъ очный кезеги оьтти. Эгер заочный кезекке 2886 аьризе 87 субъектлерден туьскен болса, аьли 1600 катнасувшылар растылар. Конкурста окувшылар, студентлер, балалардынъ эм оьспирлердинъ яратувшылыгын оьрлендируьв орталыклардан ваькиллер катнастылар. Олар оьз кишкей Аталыкларынынъ оьрленуьвининъ турли йыллары, ерли самоуправлениесининъ маданияты акында хабарладылар. Енъуьвшилерди Союз Уьйининъ Колонный залында савгаладылар. 630 катнасувшылар туьрли номинациялар бойынша – «Ерли самоуправлениесининъ лидерлери»,
«Бизим муниципаллык туьзилисининъ белгилери», «Ерли самоуправлениесининъ яшавыннан бир куьн», «Эгер мен муниципаллык туьзилисининъ аькимбасы болсам» эм баскалар – енъуьвшилер болдылар. Солардынъ ишинде – Эмир Каракаев (етекши – окытувшысы Гульнара Солтанхан кызы Хозбулатова). Эмир «Эгер мен муниципаллык туьзилисининъ аькимбасы болсам» деген номинация бойынша экинши дережели дипломга тийисли болды. Ол бу конкурска видеоролик аьзирлеген.
– Эмир Каракаев тек ийги белгилерге окыйды, ол белгили ногай шаири, аьлими Джалалдин Магомед увылы Шихмурзаевтинъ немереси болады. 2025-нши йылда «Илмилер оьспирлерди уьйретедилер» Савлайроссиялык конкурсында катнасып, III орынга тийисли болган. Быйыл да ол баргылы орынды алганы – баьримизге де суьйинишли, – деп айтады окытувшысы Г.Хозбулатова окувшысы акында. Эмирге алдыда аьли де коьп енъуьвлер сагынамыз.
Суьвретте: Эмир Каракаев окытувшысы ман.