Аьли йогары технологиялар заманы деп белгиленеди.
Коьбисинше, балалар телефонлар ман олтырып, оьзлерине керекли затларды карайдылар. Болса да, бар сондай талаплы, билимге ымтылыслы балалар, элимиздинъ,
халкымыздынъ тарихи мен кызыксынадылар. Солардынъ бириси – Кадрия атындагы мектебининъ 8-нши «а» классынынъ окувшысы Рашид Акимов.
Янъыларда билимли окувшы «Эскиргенликтинъ болжалы йок» деген проектте катнасып, баргылы биринши орынга тийисли болган. Бу проект СССР-дынъ тынышлы яшавшыларынынъ кайгылы оьзгерислери, Уллы Аталык согысы заманында нацистлердинъ эм олардынъ ярдамшыларынынъ курманлары акында тарих эсин саклавга багысланган.
Кадрия атындагы мектебтинъ окувшылары Рашид Акимов эм Нурия Сулейманова етекшилери, тарих эм обществоведение окув сабакларыннан окытувшысы Фатира Эсенгелди кызы Магомедова ман Минеральные Воды каласында курылган «Фашистлер мен оьлтирилгенлерге» деген мемориалда болдылар. Бу камырда 11000 аьдем коьмилген. Олар куьнасиз аьдемлер болганлар, фашистлер аямаганлар биревди де. Соны биз мутып болмаймыз.
Окытувшы балалар ман Холокост курманларына салынган мемориалда, орта китапханада болдылар, документлер мен, китаплер мен таныстылар, сол кыянатлыкты коьргенлердинъ эскеруьвлерин тынъладылар, суьвретшилердинъ картиналарын карадылар. Олар Савлайроссиялык согыс-тарих ямагатынынъ ерли боьлигининъ етекшиси Михаил Борисович Акопян ман йолыгыстылар.
Коьп билдируьвлер йыйнады оьзининъ исине Рашид Акимов. Орта китапханадынъ «краеведение» боьлигининъ етекшиси Елена Афанасьевна Гаркуша бу оьзгеристинъ акында толы хабарлады.
Рашид Акимов «Аьжел шунъкыры» деген проекти мен биринши орынга тийисли болды, онынъ исине тийисли баа берилди. ДИРО окув-методикалык эм илми иси бойынша проректоры Ахмед Курбанов енъуьвшилерди кутлап, аьлиги ямагатта бу проект маьнели экенин белгиледи.
Рашидтинъ атасы Аджинияз Акимов биринши куьнлерден алып СВО еринде яв ман согысады. Ол оьктемсийди атасы ман.
Кадрия атындагы мектебинде Рашид Акимов ийги окыйтаган окувшылардынъ сырасында.
– Рашид – бек танъ бала, ол ясуьйкенлерге сый этип, кишкейлерди коршалап, баскаларга коьрим болады.
Тек бирге окыйтаган тенълерине тувыл, баскаларга да коьмек этпеге аьзир. Ога сенмеге болады, берилген борышларды ийги этип, ерине еткерип толтырады, мектебте, республикада болатаган шараларда катнасады Рашид. Онынъ куьлемсиреви тоьгерекке нур себелегендей, ярык, – деп хабарлайды ийги соьзлер мен окувшыдынъ акында класс етекшиси Марина Ивановна Сорокина.
Рашидтинъ уьстинликлери алдыда деп шекленмеймиз, онынъ аты аьли де айтылар. Окувында, яшав йолында уьстинликлер йораймыз.
Суьвретте: Р.Акимов класс етекшиси мен.
