Енъуьв куьниннен сонъ, Ногай район орталыгы Терекли-Мектеб авылында элимиздинъ туьрли регионларында яшаган халкымыздынъ ваькиллерин IV Савлайногайлык «классический и народный жим лежа» бойынша «Ногай баьтирлер» деп аталган турнири йыйнады. Базласларда Ставрополь крайыннан, Шешен Республикасыннан,
Ногай районынынъ авылларыннан, Дагестаннынъ туьрли районларыннан 14 ясыннан алып 55 ясына дейим эр кисилер катнастылар.
Шарады спорт устасы Ваис Алибий улы Аджигеримов Ногай район яшавшыларынынъ коьтергишлеви мен уйгынлады.
Биринши кере «Ногай баьтирлер» Савлайногайлык «классический и народный жим лежа» спорт кеби бойынша турнири Ставрополь крайынынъ Коясыл авылында 2025-нши йылдынъ февраль айында озган, экинши кере ногай палванлары Шешен Республикасынынъ Каршыга авылында йыйналганлар. Оннан сонъ оларды Ыргаклы авылында
хош коьргенлер, аьли болса конаксуьер кенъ Ногай шоьли йолыгып туры, эндиги йол белгиленген турнир Нефтекум районынынъ Новкус-Артезиан авылында озгарылаяк.
Савлайногайлык турнирининъ ашылувында йыйылганларга каратылган коьнъилди коьтерген эм енъуьвлерге даьвлендирген соьзлерин уйгынлав комитет председатели Ваис
Аджигеримов, ТереклиМектеб авыл аькимбасы Марат Кулунчаков, Ногай район имамлар советининъ председатели Мухтар Мусаев, международный классынынъ спорт устасы Эльдар Эсполов, Шешен Республикасыннан келген конак Дауд Еракаев айттылар.
Ваис Аджигеримов баьри конакларды, катнасувшыларды, каравшыларды хошлап, сосындай шараларда катнаскан ясларымыз куьннен-куьнге, йылданйылга куьш-куватлы эм
тыпак бола беретаганын белгиледи.
Мухтар Мусаев яслардынъ спортка кызыксынувын оьстирген аьдемлер уьйкен савап казанатаганын билдирди, неге десе ол тек ден савлыкты беркитип калмай, ясларды коьп баьлелерден саклайтаганын белгиледи.
Бизим ногай халкында спорттынъ туьрли кеплеринде чемпионлары, солардынъ арасында бокс бойынша олимпийский чемпионы, эркин куьрес бойынша Европа чемпионы бар экенин белгилеп, «классический и народный жим лежа» спорт кебинде де чемпионлар болар деген уьйкен сенимин Дауд Еракаев этти.
Бу куьн ногай ясларга карап куванатаганы ман Эльдар Эсполов боьлисти.
Онынъ соьзлери мен, мунда ногайлардынъ куватлы деген яслары йыйналган, тек озган йыл биринши кере белгиленген спорт бойынша Савлайногайлык турнири оьткен эм сол кыска заман ишинде заьлимдей уьстинликлерге етисилген, айтпага, яслар сырасында спорт усталары, международный классынынъ спорт усталары шыкканлар.
Мине базласлар басланды, сукландырган ногайдынъ эр йигитлери оьз куьшлерин сынадылар. Элбетте, куьш-куватлы, юреклерди оьстирген йигитлеримиз аз тувыл экен, солар да бу куьн Ногай районында йыйналып, куьшли ювыкласувга эм тыпакласувга аьли де бир абыт эттилер. Базласларга келген конакларды конакбайлар уьйкен сый ман йолыктылар, оьзлерин тап ювык кардашларына келгендей этип сезсинлер деп, яхшы шалыстылар. Турнир катнасувшыларына международный класслы спорт устасы Эльдар
Эсполов белги берди. Мунда спорт мастерлери Джамаладин Шангереев, Фарид Тилеков, Ислам Аджимуратов, Даниил Добров эм коьп баскалар ортакшыладылар. Ногай баьтирлери сырасында 190 килограммлы темирди коьтергенлер де болдылар. Олардынъ энъ де яс дегени 14 ясында эди, ол баргылы орынларды казанмаса да, мундай уьйкен шарада катнасувы ман уьстинликке етти. Эндиги онынъ эм сондай баска йигитлердинъ юрегинде кызыксынув оты янар деген сенимин уйгынлавшылар этедилер. Базласлар сырагылары бойынша Ногай район ортак командасы биринши орынды казанды. Экинши орынга Ставрополь крайынынъ йигитлери, уьшинши орынга Шешен Республикасыннан келген яслар тийисли болдылар.
Бу куьнги Савлайногайлык турнири уьйкен байрам аьлде озды, мунда атабабаларымыздынъ уллылыгы, аьлиги ногай спортсменлер акында айтылды. Орынларды бийлеген
командаларга акшалай баргылар, баалы савкатлар, чемпион белбавлары, Сый грамоталары тапшырылды.
Бу байрамга айланган базласлар коьпке дейим онынъ катнасувшыларынынъ эм каравшыларынынъ эсинде сакланаягына шек йок.
Ваис Аджигеримов бу куьнги турнирди уйгынлавда карыж яктан яде кол эм соьз коьмегин эткен баьрине де уьйкен разылыгын билдирди. Солай ок ол «Спарта» фитнес залдынъ аьрекети аркалы районымыздынъ яслары «классический и народный жим лежа» спорт кеби мен куьшли кызыксынып баслаганын эм оьрленуьвин белгилейди.
Нурият Кожаева.
Суьвретте: шара катнасувшылары.