Ногай район халк яратувшылык уьйинде Сраждин Батыров атындагы Терекли-Мектеб авылдынъ саниятлар мектебининъ 60 йыллыгына багысланган сонынъ окувшыларынынъ эсап-беруьв концерти болып оьтти.
Бу айтылган мектебтинъ негизи муннан алыстагы 1966- ншы йылда басланган. Сонынъ туьзилуьв тарихи эм бу косымша билимлендируьв балалар учреждениесининъ оьрленуьви акында сонынъ директоры, ДР ат казанган маданият куллыкшысы Анвар Аджибаев шыгып хабарлады. Онынъ айтувы ман, окув ошагы хор, суьврет ясав, театр эм музыка саниятына балаларды уьйретуьв ниет пен ашылган. 1966-ншы йылда Терекли-Мектеб авылында Ногай район ямагаты атыннан ДР ат казанган маданият куллыкшысы Сейдахмет Рахмедовтынъ (Алла ога тынышлык берсин) аьрекети мен музыкалык мектеби куллык этип баслайды.
Мектеб ашылатаган биринши йыл мунда тек 8 окувшы билим алган, оларды эки окытувшы окыткан.
Мектебтинъ биринши выпускниклери деп фортепиано классы бойынша Фарида Нукаева ман Эльмира Толубаева саналадылар. Мектеб сол заманда тек музыкады окытув ниет пен ашылганга музыкалык мектеби деп айтылып юреди. Соннан бес йыл оьткен сонъ художестволык мектеби де ашылады эм онынъ биринши директоры Махмуд Манкаев болады. Оны сонъында Алтынбийке Акбердиева авыстырады.
– Ол (А.Акбердиева) тек суьвретши тувыл, ол соны ман бирге кийгиз эм алтынкуьмис ыспайылыклары бойынша ногайлардынъ кол оьнерин тергевши болады. Ога ДР ат казанган маданият куллыкшысы деген сыйлы ат берилген. Эки мектебтинъ негизин салувга халкымыз арасында кенъ белгили композиторлар эм талаплы музыкантлар, ДР ат казанган маданият куллыкшылары Мурзадин Османов пан Залимхан Максутов оьз уьлислерин косканлар. Бу аьдемлер оьз исине янын-канын берип куллык этуьвдинъ яркын уьлгилери боладылар. 1989-ншы йылда эки мектебти де косып, саниятлар мектебин туьзбеге деген карар алынады. 1990-ншы йылда саниятлар мектебининъ директоры болып белгили ногай композитор эм музыкант, ДР эм РФ ат казанган маданият куллыкшылары, КЧР ат казанган артисти, ДР Халк артисти Яхъя Кудайбердиев келеди.
Заман бойында Яхъя Кудайбердиевтинъ аьрекети мен мектебте художестволык эм музыкалык боьликлерден баскалай театр, хореография эм хор боьликлери де туьзиледилер. Соьйтип, кишкей окув ошагыннан мектеб заман узагында универсаллык мектебке, Ногай районынынъ косымша билимлендируьв орталыгына айланады.
Буьгуьнлерде мунда 210 окувшы билим алады. Оларга йогары эм орта кеспили 19 окытувшы дерислер юритеди. Саниятлар мектебининъ буьгуьнлерде Карагас эм Куьнбатар авылларында эки филиаллары бар, – деп белгиледи оьз соьзинде Анвар Аджибаев.
Муннан сонъ саниятлар мектебининъ етекшиси шатлыклы аьлде окув ошагынынъ окытувшылары ман окувшыларына Сый грамоталарын тапшырды. Савгаланганлар ишинде
Алтынбийке Акбердиева, Яхъя Кудайбердиев, Эльмира Толубаева, Султанат Бальгишиева, Марина Курганова, Мархаба Шалиева, Эльмира Махмудова, Боранбийке Коккезова, Мукминат Отевалиева, Анжела Аджиева, Марина Оразбаева, Расиль Акболатов, Адильхан Менласанов, Ралина Махмудова, Алина Сагиндикова, Алина Курманова, Кызылгуль Аджимуратова эм коьп баска окытувшылар ман окувшылар аталдылар.
Шарадынъ эсап беруьв концерт программасын балалар саниятлар мектебининъ хоры композитор Залимхан Максутовтынъ «Шоьллигим» деген йыры ман ашты. Бу хор коллективинде 30-дан артык мектеб тербияланувшылары катнасадылар.
Концертте оьз оьнер усталыкларын домбра классы бойынша Яхъя Кудайбердиевтинъ окувшысы – Алим Карагулов, фортепиано классы бойынша Эльмира Толубаевадынъ окувшысы – Дженнет Боранбаева, театр боьлигининъ Сакинат Нурлубаева окытатаган классы,
домбра классы бойынша Адильхан Менласановтынъ тербияланувшысы – Кельдимурат Боршакаев, кобыз классы бойынша Расиль Акболатовтынъ окувшысы – Карим Куруптурсунов, Боранбийке Коккезовадынъ окувшысы – Алия Черкесова эм коьп баскалар коьрсеттилер.
Совет язувшысы Борис Васильевтинъ «А зори здесь тихие» деген китаби бойынша театр боьлигининъ етекшиси Марина Кургановадынъ тербияланувшылары согыс темасына кызыклы сценка коьрсеттилер.
Ногай район хатын-кызлар советининъ председатели, ДР Ямагат палатасынынъ агзасы Асият Манкаева саниятлар мектебининъ окувшыларын эм окытувшыларын сыйлы мереке мен йылы кутлады эм мектебтинъ айырым тербияланувшыларына – Савлайроссиялык эм республикалык конкурслардынъ енъуьвшилерине савкатлар тапшырды.
Шарадынъ тамамында саниятлар мектебининъ директоры Анвар Аджибаев быйылгы выпускниклерге аттестатлар тапшырды.
Магомет-Али Ханов.
Суьвретте: байрам концертинде.
