Буьгуьнлерде Ногай драмалык патшалык театры Дагестан Республикасынынъ ат казанган артисти Гульфия Расул кызы Кокоевадынъ етекшилеви астында аьрекетлейди. Тек
янъыларда театрда «Суюмбике. Шоьл кызы» деп аталган спектакль салынды. Спектакльдинъ режиссеры эм авторы – Булат Минкин.
Театр директоры Гульфия Кокоевадынъ айтувы ман, спектакльде ашык кепте ногай тарихине эм янъы технологияларга терен сый коьрсетиледи.
– Бизим эткен исимиз – аьр бир сес, кийимдеги аьр бир тигис, аьр бир соьз бир ниетке каратылган: каравшыга Суюмбикеди таварых тувыл, тири, аьр бир ногайдынъ тамыры ман урып турганын, ногайлардынъ уллылыгын эм бир затка да бойсынмайтаган куьшин, эркинлигин коьрсетпеге. Спектакль оьз борышларын толтырды – шоьлге данъклы кызын кайтарув, Суюмбике – ногай бий Юсуфтынъ кызы. Сес аркасы ман ногай тарихи коьрсетилди – елдинъ сызгырувы, атлардынъ ювырувы, бурынгы саз алатлардынъ шалынувы. Бу спектакльде ногай халкынынъ кайгысы коьрсетилди. Янъылыктынъ бириси – Суюмбикединъ бактысын халктан айырмай, эки уллы династияларынынъ бузылувын
коьрсетуьв. Спектакль – ногай куьши, эркинлиги эм халкы уьшин оьзин курманлык этуьв. Ногай каравшыга ол – спектакль-Эс, – дейди Гульфия Расул кызы.
Ызгы айлардынъ ишинде Ногай патшалык драмалык театры ХантыМансийск автономиялык округында, КарашайШеркеш Республикасында «Суюмбике. Шоьл кызы»
спектаклин коьрсеттилер. Федоровский, Белый Яр поселокларында, ЭркенШахар авылында спектакльди суьйип карадылар.
Бу куьнлер маданияттынъ эм санияттынъ шынты байрамы болдылар. Каравшылар ногай эпосынынъ ярасыклыкка толган тарихин коьрдилер. Актерлардынъ ойыны, режиссердынъ иси, спектакльдинъ салувынынъ терен белгиси залда олтырган аьдемлерди сукландырмай болмады.
Карс кагув ман хош алдылар актерларды. Хошлав соьзи мен, оьз ойлары ман Карашай-Шеркеш Республикасынынъ ямагат аьрекетшиси Валерий Казаков эм шаир Зухра Булгарова боьлистилер.
Суюмбике – ногай шоьлининъ данъклы кызы. Сога биз тагы да бир кере шайыт болдык. Ногай патшалык драмалык театрына аьли де коьп ийги спектакльлер салып, каравшыларды сукландырмага амал болсын деп йораймыз.
Г.Бекмуратова.
Суьвретте: Ногай театрынынъ актерлары ЭркенШахарда.
