Аьскершилердинъ бактылары. Кайсы оьмирлерде олар яшаса да, аьскерши бактылары туьрли боладылар, бу ерде бизде, авылэлде айтылганлай, Кудай аьдемге не зат язган болса, соннан кашып болмайсынъ. Уллы Аталык согысы йылларында бирер аналар ман хатынлар оьз увыллары эм эрлери согыста ян берген деп билдируьвлер алса да, кесек заманнан яде йыллардан олар аман кебинде табылып, уьйлерине де кайтып келгенлери болганлар…
Бизим ердесимиз, Ногай районынынъ Червленные Буруны авыл яшавшысы, Ренат Эсманбет увылы Каратаев муннан бир неше йыллар артта коьплеген яс аьдемлердей болып, Москвага ислемеге кетеди. Оьткен 2025-нши йыл ол соннан Рязань калага келеди эм Россия Савытлы Куьшлерининъ украин националистлерине карсы юритилетаган согыс спецоперациясында катнасувга туьзилип турган куьбине оьз эрки мен язылады. Рязань бизим элде авадесант аьскерлерининъ тувган ери деп саналады. Сол себептен Ренат Каратаев ердесимиз мунда согыска аьзирленуьв курсын оьтеди. Сол куьнлерде ол анасы Тойбийкеге мунда, Рязаньде, оларды парашютлар ман ерге каргып уьйретедилер деп билдирген.
Былтыр 4-нши июньде увылы анасына тел согады эм тезден олардынъ куьбин СВО ерине йиберееги акында айтады. Соннан уьш юма оьткен сонъ, 2025-нши йылдынъ 23-нши июлинде Тойбике анасы увылы куллык этетаган аьскер боьликтинъ командирининъ куллыгын кесек заманга юритуьвшидинъ эм штаб етекшисининъ куллыгын кесек заманга
юритуьвшидинъ коллары басылган билдируьв алады. Сол билдируьвде онынъ увылы гвардия рядовойы Ренат Каратаев былтыр 16-ншы июньде Россиядынъ Курск областининъ яде Украинадынъ Сумской областининъ ерлеринде сес-хабарсыз йок болганы акында язылган эди. Сес-хабарсыз йок болган…
Олай дегени, аьскерши согыс борышты толтырувдан кайтпаган, ама яралылар ман ян бергенлер арасында да ол санда йок экен. Бу аьл бир ягыннан аьдем уьйиннен шыгып куьшли туман ишине синъип кеткендей аьлге усайды.
Оннан сонъ сол аьдемди излейдилер, бир ерден де таппайдылар эм буьгуьнге дейим де таба алмайдылар. Тек дуныяда бир юрек – тапкан анадынъ юреги сондай аьл мен ярасып болмайды. Ол калай, аьши, уьйкен аьдем кайтип йойылмага болады, йок, ол тири эм аьли бир ерде турады, белкиси, эси келмеген болар, ама ол тири!..
Онынъ сондай ой-ниетин йоьплеген кимик былтыр 2-нши октябрь куьнинде «Россия-1» орталык телеканалынынъ «Вести» программасынынъ 44-нши минута 39 секундасында, москва заманы ман куьндизги 16 саьат 30 минутада, онынъ айтувы ман, Ренат увылын госпитальге йиберип турган аьсерин коьрсеткенлер. (Тойбийкеге сонъында сол
репортажды интернеттен таппага коьмек эткенлер. Ол сонынъ ссылкасын да саклап калдырган.
Тойбийкединъ айтувы ман, бу репортажды журналист Татьяна Ларина аьзирлеген). Бу ролик – буьгуьнлерде онынъ увылы тири экени акында ялгыз бир шайытлама болады.
«Каратаев Ренат Эсманбетовичтинъ ыхтыярлары эм закон ягыннан кызыксынувлары бузылмасын деп, ол кайдай аьллерде йок болганын, онынъ дурысында да турган ерин (есирде эгер болса, кайсы авыл-калада), эгер ян берген болса, кайдай аьллерде бергенин, эм кайсы авыл-калада ол койылганын, солай ок онынъ оьзин Ростов каладагы морг не
себептен аькелмейтаганын токтастырмага тилек этемен. Каратаев Ренат Эсманбетовичтинъ йойылатаган аьллери бойынша тергев эсабында бойсынатаган аьдемлерге онынъ акында бир зат сама билмеге болатаган аьскер боьликтинъ етекшилериннен, оны ман бирге куллык эткен йолдасларыннан эм баска инсанлардан сорастырув юритуьвди тапшырмага тилеймен», – деп язган ол сонъында онынъ увылы турган аьскер боьликтинъ командирине.
Соны ман бирге Тойбийке-абай увылынынъ йойылганы акында «Куьт мени» («Жди меня») деп аталган телеперадачага да язган.
Аьли уьшин онынъ сондай хатларына явап келгени йок. Тойбийке-абай, биз журналистлер болган сонъ, ога да увылын излестирмеге коьмек эткенди тиледи. Буьгуьнлерде онынъ
СВО ерине бармага яде, увыллары йойылган деп саналатаган аьскершилердинъ аналарындай болып, кедесин оьзи излестирмеге амалы йок.
Болса да Тойбийке-абай увылы аман экенине сенеди, эм биз де оны ман бирге сол затка сенемиз эм, дурысында да, халк айтканлай, сеним энъ ызгы болып соьнеди де. Биз де оны ман бирге Кудайдан Ренат Каратаев эм буьгуьнлерде сес-хабарсыз йойылган бизим баьри ердеслеримиз де табылганын эм уьйлерине кайтып келгенлерин йораймыз.
Баьри оьлимлерге де эм баьлеказаларга да ашув уьшин!..
М-А.Ханов.
Суьвретте: Р.Каратаев.
