Уллы Аталык согысындагы атайларымыздынъ енъуьви бу куьнги согыс спецоперация катнасувшыларына йигитликлерге даьвлендируьвдинъ таьвесилмес булагы болады. Олардынъ юреклеринде Уллы Енъуьв мен байланыслы оьктемлик яшайды эм атайларынынъмкуьшлилиги, оьзин аямавлыгы, элге суьйими акында эслерине салады. А бизим юреклеримизди оьктемлик пен тек Уллы Аталык согысынынъ тувыл, бизим заманнынъ баьтирлери де толтырадылар.
Оьз аьелининъ баьтирлери мен Уллы Аталык согысынынъ ветераны Янпой Доржиевтинъ асабалары да оьктемсийдилер. Онынъ данъкы уныгы Алимбек Доржиевти эм немереси Султанбек Аджиковты атайынынъ эм уьйкен атайынынъ нацизм мен куьресуьв исин бардырмага эм янъы енъуьвлерге даьврендирди. Бу куьнлерде олар экеви де согыс
спецоперация барысында аьскер борышларды йигитше толтырадылар.
Султанбек Аджиков 2001-нши йылда Терекли-Мектеб авылында тувган. Онынъ балалыгы эм мектеб йыллары Сургут каласында озган. Султанбек тек энъ де ийги окувшылар сырасында болып калмай, аьдил эм туврашыл, йигерсизлерди коршаламага дайым аьзир аьдем болган. Ердесимиз ЕГЭ-ди йогары балларга берип, Урал патшалык юридический университетке окымага туьскен.
Йогары окув ошагынынъ 3-нши курсынынъ студенти Элине эр борышын бермеге суьйип, кызмет кылмага атланады. Службасын Султанбек Исламович Саратов областинде ракета
аьскерлеринде оьтеди.
Аьскерден ефрейтор Султанбек Аджиков уьйине бек ийги характеристика ман кайткан, сонда ястынъ яваплылыгы, намыслыгы, аьскер исине ийги аьзирлиги белгиленген. Эр
борышын толтырып, ердесимиз Сургут каласында оператор болып куллык этеди. Онынъ иси аьруьв барды, сулыбы да куьннен-куьнге оьсти.
Украинадагы согыс спецоперациясынынъ доьртинши йылы, узынлыгы ман ол Уллы Аталык согысыннан да артты. Аьллердинъ тыныш тувыл экенин коьптен бери анълаган
яс, уьйкен несиллердинъ уьлгиси мен, Элин коршалавга турмага карар алады. Онынъ уьйкен атайы Янпой Доржиев ога тек ювык аьдем тувыл, коркынышсызлыктынъ эм баьтирликтинъ белгиси де болады. А алган яралары эрклигин эм шыдамлыгын коьрсеткен, анасынынъ аданасы, СВО катнасувшысы Алимбек Доржиевтинъ уьлгиси Султанбектинъ Россия Федерациясынынъ Коршалав министерствосы ман контракт туьзетуьв мен байланыслы карарын алувдан тура ойын беркитти. Ястынъ алган карары акында анасы Эльмира Доржиева да билмеген. Кыскаяклы сонынъ акында ят аьдемлерден эситип, увылына Сургут каласына барады. Анасы Султанбек пен узак заман соьйлейди, оны тербиялы, билимли, танъ аьдем этип оьстирер уьшин кайтип шалысканын эм яшавынынъ маьнесин тек бир ялгыз увылында коьретаганын да айтады. Ама Султанбек оьзининъ алган карарыннан таймай, 3-4 куьннен, 2025-нши йылдынъ 23-нши сентябринде согыс спецоперация озган ерге йол алады.
«Кайтип мундай кыйын заманларда шеттен карап турмага болады. Меним уьйкен атайым Уллы Аталык согысындагы енъуьвге, аьли болса Алимбек-акай уьлис косып турганлай, мен де коспага суьемен. Сен кыйналма, мен кайтарман», – деген увылынынъ соьзлерин Эльмира Доржиева куьн куьнлерде де коьзяслары ман эсине алады.
Киши сержант Султанбек Аджиков Луганск Халк Республикасынынъ еринде согыскан. Ол штурмовик эсабында аьскер операцияларында йигитше катнаскан. Ызгы заман ол акасы Алимбек пен бирге Рубежное каласынынъ туьбинде яв ман куьрес бардырады. Султанбек бу куьнлерде боьликти етекшилейди, оны аьскер сырын ашпас ниетте,
белгилемеге ярамайды. Онынъ иси бек яваплылы эм кавыфлы.
Султанбек Аджиков – бизим заманнынъ баьтири. Ол мынълаган россия аьскершилери мен бирге согыс спецоперация озган ерде йигитлик коьрсетеди. Ол элге суьйимнинъ,
намыслыктынъ, аьскер кардашлыктынъ шынты баасын билген аьдемлердинъ бириси. СВО катнасувшылары – Аталыкка куллык этуьвге даьврендирген уьлги боладылар. Олар – Россиядынъ оьктемлиги.
Нурият Кожаева, ДР ат казанган журналисти.
Суьвретте: Алимбек Доржиев эм Султанбек Аджиков.
