Ердесимиз, буьгуьнлерге официаллы аьлде, аз санлы ногайымнынъ уллы юрекли, бизди оьктемсуьв деген сезим мен ювык эткен йигитлеримиздинъ бириси Алимхан Резван увылы Моллаболгановтынъ етимислери акында аз эситпеймиз.
Согыс спецоперациясы басланганлы бери Алимхан Моллаболганов «Участник СВО», «За боевые отличия», «За освобождение Авдеевки», Жуков, Суворов, II дережели «За заслуги перед Отечеством» деген орденининъ медальлери мен, «Отважный» деген коькирек белгиси мен савгаланган.
Аьр бириси ога аявлы эм кайдай кыйын салув ман келгенлери тек оьзине белгили, биз болсак, Алимханнынъ аьр алган савгасына суьйинемиз эм оны ман оьктемсиймиз. Сондай увылга тербия берген ата-анага разылыгымызды да билдиремиз. Алимхан Резван увылы Ногай районымыздынъ ТереклиМектеб авылында тувып-оьскен эр киси болады: авылдынъ А-Х.Джанибеков атындагы мектебинде билим алып, оннан сонъ Астрахань каласындагы кеспили технологиялар билим ошагында окувды бардырады. Оннан яс
аьдем колына кеспи алып шыгады. Булай карасанъ, ис рыногында керекли, аьлиги заманнынъ яс аьдемининъ канагатын кандырмага болатаган карыж да келеек кеспи колында, ама Алимханнынъ яс юреги Элди коршаламага керекли кеспиди алувга шакырды. Ол Михайловский академиясына окувга йолланады. Мырады толды. Алимхан – сол окув
ошагынынъ выпускниги. Буьгуьнлерде согыс спецоперациясы оьтип туратаган ерлерде Элдинъ кызыксынувларын яклайды.
Онынъ яшав йолы – Аталыкка суьйими туьнегуьнги кишкей эр балады аьскер сырасынынъ сенимли тиреви эткеннинъ аян мысалысы.
Санкт-Петербург каласынынъ престижли деп саналган аьскер академиясынынъ студенти Алимхан Резван увылы Моллаболганов «Ракетное и РСЗО» факультетин сайлаган. Мунда ракета аьскерининъ «ак суьеклерин» (элитага соьйтип айтылады) аьзирлейдилер. Ол затлар артта болса да, буьгуьнлерде алган билим, сулып оьз емислерин бередилер.
Тамамы – Урал еринде, лейтенант аьскер ис орынында аьрекетин бардырады.
Йигерли йигитимиз Алимхан Резван увылы Моллаболгановтынъ аьскерли ис йолы Свердловск областинде басланды, яс офицер эсап етекшиси болды. Бу ис орын оны коьп ис сырына уьйретти. Аьлиги заманларда сол сулып ога буьгуьнлерде аьдем яшавын куткарувшы болатаган карар да алмага амал береди. Йыллар оьтедилер, сулып та
байыйды, талабы, билими бараьдем, карьера сокпагы ман да тек алдыга барады. Бизим ердесимиз Алимхан да – алдыга ымтылувшы офицерлер санында. Мен бу макаламды язып турган шакта, ол ракетно-техникалык дивизионынынъ етекшисининъ орынбасары ис орынында эди. Мен ога аьли де йогары оьсуьвди йорайман.
Ызгы заманларда онынъ савгаларына тагы да бир патшалык баргысы косылган – «За проявленное мужество» медали баьтир тапшырылган аьскершиге.
Аьскерши йигит пен мен коьзбе-коьз коьрискен аьдем тувылман (аьли заман сондай, янъы технологиялар аркалы кайдай билдируьвлер де таппага болады). Мен онынъ ата тамыры бойынша аьптеси Сайрат пан аьруьв таныс боламан, Алимхан акында билдируьвлерди мага берген де ол. Сайратка мен ак юрегимнен разылыгымды билдиремен, аданасына тек савлыкты, исинде уьстинликлерди йорайман.
Алимхандай йигитлер болган шаклы, бизим, Россия халкларында сеним де уьйкен, енъуьв тек Россия элиндики!
Г.Сагиндикова.
Суьвретте: Алимхан Моллаболгановка савга тапшырылганда (онъында онынъ атасы Резван).
