Янъыларда Кизляр районынынъ Южное авылында согыс спецоперация барысында йигитлерше ян берген Валех Эминовтынъ эстелиги оьмирлетилди. Шарада Кизляр район администрациясынынъ аькимбасынынъ орынбасары Мурад Багандов, «Южное» авылыннан администрация куллыкшысы Даян Исаев, аьскершидинъ аьели, окытувшылар эм окувшылар ортакшылык эттилер. Мемориаллык тактасын ашпага аьскерши Валех Эминовтынъ анасы эм онынъ ян косагына ыхтыяр берилди. Сондай шара Рыбалко авылында да озды. Онда йыйылганлар Нажмудин Магомедовтынъ эстелигине сый эттилер. Эстелик тактасын ашувга Кизляр район администрациясынынъ аькимбасынынъ орынбасары Мурад Багандов эм аьскершидинъ ювыклары йыйылган эдилер. Мемориаллык тактасы ашылганнан сонъ, йыйылганлар ян берген аьскершидинъ эстелигин бир такыйка уьндемей турувлары ман эскердилер. Хуцеевка авыл мектебинде де алдына салынган борышын толтырувда яны курман болган мектеб выпускниги Саидахмед Магомедовтынъ йигитлигин оьмирлеттилер. Шарадынъ барысында район администрациясынынъ ваькиллери, сонынъ ишинде, маданият эм спорт боьлик етекшисининъ исин кесек заманга юритуьвши Анастасия Куц, Яснополянский авыл администрациясынынъ аькимбасы Шамиль Хажаров, баьтирдинъ кардаш-тувганлары, окытувшылар, ис коллективи эм окувшылар катнастылар. Мемориаллык тактасын ашпага Саидахмедтинъ атасына эм Анастасия Куцка ыхтыяр берилди.
Бондареновка авыл орта мектебинде эткен йигитлиги оьмирлерге эстелик болып яшаяк ерли яшавшысы Гадислан Гаджиевтинъ эстелигине де мемориаллык тактасы ашылды. Шарадынъ барысында Анастасия Куц эм Косякино авыл администрациясынынъ аькимбасы Татьяна Галушкина, аьскершидинъ кардашювыклары эм мектеб ямагаты катнастылар. Мемориаллык тактасын баьтирдинъ увылы Магомед Гаджиев ашты. Оннан сонъ йыйылганлар ян берген йигиттинъ эстелигин бир такыйка уьндемей турувлары ман эскердилер эм шешекей байламларын салдылар.
Кизляр районынынъ Тушиловка авылынынъ ортак билимлендируьв мектебинде де СВО юрген ерде аьскершилик борышын толтырувда яны курман болган Александр
Ковалевтынъ эстелигине де мемориаллык тактасы ашылды. Район администрация аькимбасынынъ биринши орынбасары Тимур Гаирбеков, Тушиловка авыл аькимбасы Наталья Гигалаева, баьтирдинъ кардаш-тувганлары, окытувшылар эм окувшылар ердесининъ эстелигин бир такыйка уьндемей турувлары ман эскерип, гуьл байламларын салдылар. Заречное авыл мектебинде де Арлан Эминовтынъ эстелиги оьмирлетилди. Мемориаллык тактадынъ ашылувы район администрация аькимбасынынъ коьмекшиси Амирхан Даитбеговтынъ эм баьтирдинъ анасынынъ катнасувы ман озды. Баьтирдинъ кардаштувганлары, мектеб ваькиллери эм
окувшылар эстелик тактады ашып, ян берген баьтирдинъ эстелигин бир такыйка уьндемей турувлары ман эскердилер.
Солай болып, Александрия авыл орта мектебинде де согыс спецоперация барысында яны курман болган Ибрагим Абдулкеримовтынъ эстелигине де мемориаллык тактасы ашылды. Шарада район администрация куллыкшысы Амирхан Даитбегов, Александрия авыл аькимбасынынъ ис аьрекетин кесек заманга юритуьвши Гамзат Гаджиев эм баьтирдинъ аьели ортакшылык эттилер.
Э.Кожаева.
Суьвретте: шарадан коьринис.