Авылымыздынъ ясуьйкени, насихатшымыз Ахмат Биймурза увылы Кульниязов уьстимиздеги июль айынынъ 19-ншы
куьнинде 80 ясына толаяк эди (яткан ери еннетли болсын).
Оьзи арамызда йок болса да, аты онынъ бизим эсимизден таймаяк, мутылмаяк. Халкы арасында ийги аты сакланган ердесимиздинъ 80 йыллык мерекесине багыслап,
Ногай патшалык драмтеатрынынъ коллективи эстелик кешлигин озгарды. Оьз атымнан, Кульниязовлар аьели атыннан бу оьнерли коллективке, ак юректен уьйкен разылык билдирип, оьз зейинлиги мен халкын суьйиндиртип эм оьктемситип турганын йорайман.
Ахмат Биймурза увылындай аьдемлер ер юзине сийрек эндириледи деп айтар эдим.
Ол – кайдай ды бир айырым «калыптан» яратылган инсан.
Бу аьлемет аьдемнинъ бактысы эм яшав йолы акында язув, келпетин келисли соьзлер тавып, толайысы суьвретлев деген –
енъиллерден тувыл, кенем де, ясуьйкенимиздинъ мерекесине рас барып, юрек дертимди шыгарып, сыйлы ердесимди
эскермеге ниетленип, бажарган шаклы язбага токтастым…
Ахмат Кульниязов яркын эм наьсипли яшав оьмирин суьрди, ердеслери уьшин мутылмастай коьп ислер этти, халкы
арасында ийги атын калдырып.
Мектеб йылларында, коьримли окувшылар санында болып, Ахмат Биймурза увылы берк билимлер алмага, алдына салган мыратларына етиспеге шалыскан. Совет йылларында ол Ставрополь, Ростов калаларынынъ окув ошакларында йогары партшколасын окып битирген, ерли власть органларында коьп йыллар узагында кыйын салган. Айтпага, 22 йыллардан артык заман Ахмат Кульниязов Арсланбек авыл Советининъ председатели болып куллык эткен. Оьз куллыгына, ис борышларына
мукаят аьдем болып, халк пайдалыгы уьшин кыйынын аямаган, авыл басшысы болып куллык этуьв шагында яшавшылардынъ аьр бирисине коьмегин тийгисткен, керекли маслагатын берген.
Ахмат Биймурза увылы – йогарыдан савкатланып берилген зейинлиги арткан аьдем.
Саз алаты – домбырада усташа ойнаган ясуьйкенимиз бир неше йылларын Ногай патшалык драмтеатрда куллык этуьвге багыслаган. Оьз оьнерлиги мен театр каравшылар арасында уьйкен сый-абырай казанган, «Дагестаннынъ ат казанган артисти» деген атка тийисли этилинген. Онынъ йырлаган аьр йыры, театрда ойнаган рольлери аьримиздинъ эсинде калаяк.
Ногайымнынъ ат казанган сен данъкы,
Ахмат атлы шоьлдинъ алал увылы.
Кайтпас йолды алды еннет бавына,
Насихатын калдырып оьз халкына.
Сыйлы аты онынъ бир де мутылмас,
Халкы уьшин янын берип яшаган.
Онынъ соьзин тынълап калган адаспас,
Тувра юрер ол калдырган йолы ман.
Танълыгы, ян тоьрининъ кенълиги арткан, алал юрекли ердесимиз Ахмат Кульниязов оьз наьсибин ян косагы Авасхан ман аьел курып, татымлыкта оьмир суьруьвде тапты: ол – ер юзине доьрт аьвлетлерин эндирип, оларды эдап, анъ-акыл яктан тербия берип, билимли этип оьстирди, аьр бирисин уьйли-эсикли этип, олардан тувган саьбийлерге куьезленип яшады. Авылшылар, халкыарасында онынъ аты эсимизден таймай, дайымга сакланаяк.
Саьнетли Янгазиева, окытувшы.
Суьвретте: Ахмат Кульниязов.
