Махачкалада 23-нши июнь — 6-ншы июль куьнлеринде шахматлар ойыны бойынша Дагестан Республикасынынъ бириншилиги болып озды. Онынъ катнасувшылары бу ойыннынъ уьш туьрли кепли ярыслары бойынша сынастылар: коьптен официаллык аьлде токтастырылган йорыклар тутылатаган ярыслар (классические шахматы), рапид (быстрые шахматы) – Халклар ара
шахматлар организация ман (FIDE) токтастырылган йорыклар ман келисте аьр катнасувшыга 10 такыйкадан артык, ама 60 такыйкадан кем заман берилетаган ярыслар эм блиц-ойыны (аьр ярыс катнасувшысына 10 такыйкадан кем заман бериледи).
Ярысларда республикамыздынъ 10 муниципалитетлериннен 150 энъ ийги спортсменлери катнастылар.

Ногай районы атыннан 9 ясына дейимги эр балалар куьбинде А.Ш.Джанибеков атындагы ТереклиМектеб орта мектебининъ 1-нши класс окувшысы Альберт Елакаев эм «Ногай Эл» балалар бавынынъ орта куьп тербияланувшысы Давид Елакаев ортакшылык эттилер.
Ярыслар тоьгерек йосык пан 7 турнир кебинде оьттилер. Агалиинили Елакаевлер энъ йогары сырагыларга етистилер: Альберт баьри уьш турнирлерде де ойналган 21 партияларынынъ 21-инде де енъип, республика чемпионы болды.
Бу рекорд Дагестаннынъ шахматлар тарихине кирер.
5 ясындагы Давид аьдеттеги шахматлар эм тезлик шахматлар бойынша 2-нши орынды бийледи, тек акасына енъилип, блиц-ойынында ол – 3-нши орында.
Ярыслар сырагылары бойынша Альберт эм Давид Елакаевлер республикамыздынъ йыйылма командасы сырасына кирдилер эм Савлайроссиялык эм Округлар бойынша турнирлерде республика атыннан ортакшыламага ыхтыяр алдылар.