Фаридадынъ етимислери аз тувыл, ол Россия Федерациясынынъ Язувшылар эм Журналистлер союзларынынъ агзасы, Карашай-Шеркеш Республикасынынъ Халк язувшысы, Чехов эм Семенов атлы медальлерининъ иеси, доьрт китаптинъ авторы болады. 
– Шоьлим мага оьнершиликке дем береди,- деп айтады Фарида Сидахметова. Шоьлге кайсы язувшы, шаир оьз асарын багысламаган. Шоьлде тувган аьдемге сол боьтен де баалы эм ювык. Фарида да сол шоьлде тувган-оьскен шаирлердинъ бириси болады. 
Кешликти Гульфия Кокоева Фарида Сидахметовадынъ поэмага авдарган «Эдиге» дестанын окувы ман баслады. Сол кешликти Сабират Абубекерова юритти. Сонынъ барысында Фаридага каратылган кутлав соьзлерин «Ногайский район» МО администрациясынынъ аькимбасынынъ орынбасары Б.Ярлыкапов, «Терекли-Мектеб» МО СП аькимбасы З.Аджибайрамов, «Ногайский район» МО администрациясынынъ маданият боьлигининъ етекшиси Я.Кудайбердиев, илми куллыкшысы Ф.Кусегенова, шаирлер С.Майлыбаева эм М.Кожаев, «Шоьл тавысы» газетасынынъ бас редакторы Э.Кожаева айтып кеттилер. Аьр бирисининъ соьзинде Фаридадынъ бай оьнери акында айтылды эм ога алдыда да уьстинликлер йорадылар. 
Кешликтинъ барысында Фаридадынъ ятлавларына язылган йырларды да эситтик. Сол йырларды уьйкен усталык пан А.Кудайбердиева, З.Аджигеримова, А.Романов, Ф.Нурлубаева, М.Рамазанова, А.Джумагулова эм рок йырлавшы Д.Якубов йырладылар. 
Кешликке келген конаклар Фаридадынъ китаплери, онынъ акында язылган макалалар салынып аьзирленген муьйиске де шайыт болдылар. 
Ызгы соьз талаплы язувшы Фарида Сидахметовага берилди. Ол болса, ызгы ятлавларын йыйылганларга окып эситтирди эм келген конакларга, кешликти уйгынлаганларга уьйкен разылыгын билдирди. 
Г.Курганова. 
Суьвретте: Ф.Сидахметова.