Белгиленген конкурста 5-7-нши класслар окувшылары катнастылар, айтпага: О. Исмаилов (К. Симоновтынъ «Мени куьт» ятлавы), А. Мавлимбердиева (Ю. Друнинадынъ «Зинка»), А. Махмудова (Р. Гапаровтынъ «Тереклиден тап  Берлинге дейим», М. Шокаева (А. Твардовский « Танкисттинъ хабары»), К.Мансурова (О.Киевскаядынъ «Ана акында баллада»), А. Саликова (В. Фирсовтынъ «Меним биринши окытувшым», А. Отарова (А. Дементьевтинъ «Ана акында баллада»), А.Ивазова (Лебедев-Кумач «Эки дос», Р. Абубекерова (Б. Окуджава «Йигитлер, аман калынъыз»). Оларга белгилерди жюри агзалары Балалар яратувшылык уьйининъ етекшиси Л.Аракчиева (председатель жюри), Ата-аналар комитетининъ председатели А.Мавлимбердиева, окытувшы М.Межитова, «Шоьл тавысы» республикалык газетасынынъ корреспонденти Н.Эрежепова, «Баьтирлерге дайымларга данък» республикалык конкурсынынъ енъуьвшиси Н.Маликов бердилер. Окувшылар ятлавларды бек ийги этип, шалысып, тынълавшылардынъ юреклериндеги сезимлерин козгап, коьзясларын суьрттирип окыдылар. Конкурстынъ сырагылары бойынша 1-нши орынды – А.Мавлимбердиева, 2-нши орынды – К.Мансурова, 3-нши орынды – О.Исмаилов пан А.Махмудова бийледилер. 
Н. Кожаева.
Суьвретте: конкурс катнасувшылары окытувшы М.Межитова ман.