Йыйында ДР Халк Йыйынынынъ депутатлары Мурзадин Авезов эм Мурат Мамаев, «Ногайский район» МР администрациясынынъ аькимбасынынъ куллыгын кесек заманга юритуьвши Хамидулла Саитов, район аькимбасынынъ орынбасары Баймагомед Ярлыкапов, район активи катнасты. Йогарыда белгиленген сорав бойынша район администрациясынынъ архитектура эм ЖКХ боьлигининъ начальниги Алибек Муллаев шыгып соьйледи. Онынъ айтувы ман, «Онъайлы кала аьллерин кеплендируьв» патшалык программасын яшавга шыгарув эсабында 2019-ншы йылда рейтинг тавыслав йолы ман тоьмендеги авыл ерлери коьрклендирилмеге кереги белгиленген: – Нариман авылында – орталык парк; – Червленные Буруны авылында – авыл паркы; – Куьнбатар эм Карагас авылларында – Аьскершилик данъкынынъ парклары. А.Муллаев йыйылганлар алдында «Дагестан Республикасынынъ «Ногайский район» муниципаллык районынынъ ерлеринде 2019-2024-нши йылларга онъайлы кала аьллерин кеплендируьв» деген муниципаллык программасынынъ аьзирленген проекти акында билдируьв этти. Ямагат палатасынынъ председатели Эльмурза Саитов муниципаллык ерлерди коьрклендируьв ниет пен шыгарылган финанс карыжлары акында айтты. Соьйтип, сол ислерге федераллык бюджетиннен быйыл 7 миллион 737 мынъ, республикалык бюджетиннен 383 249 мынъ, муниципаллык бюджетиннен 1 миллион 149 мынъ 748 маьнет акша карыжлары йиберилееги акында билдирилген. Йыйыннынъ катнасувшылары «Дагестан Республикасынынъ «Ногайский район» МР Нариман, Червленные Буруны, Куьнбатар, Карагас авыллары ерлеринде 2019-2024- нши йылларга онъайлы кала аьллерин кеплендируьв» деген муниципаллык программасынынъ проектин кабыл эттилер. Сол проект эм ямагат тынълавлардынъ протоколы «Ногайский район» МР администрациясынынъ официаллы сайтында ерлестирилген.

Бизим хабаршы.

Суьвретте: ямагат тынълавлары аьсеринде.