Мереке
Мине 50 йыл бойы Ногай районынынъ Карасу авылында татымлыкта, тил-бирликте Арикбаевлердинъ аьели яшап келеди. Аьел басларынынъ аьр кайсысы яшавда уьйкен аьдемшилик, акылбалыклык пан авыл яшавшылары арасында сый-абырай казанып келген.
1967-нши Бальбек акай Оьлмес абай ман яс шагында бир-бирин яратып, аьел курадылар. Сол курган аьелин яслар оьз яваплыгы, ис суьерлиги, туьз ниетлиги мен аявлап, беркитип, коршалап келдилер. Аьел яшавы тек байрам куьнлерден туьзилмейди. Оьз кыйыны да, куваныш куьнлери де коьп болады. Кайсы заманда да аьел ясуьйкенлери сол куьнлерди бирге боьлисип келдилер.
Бальбек-акай кесписи бойынша инженер болады. Оьз кесписи бойынша ол Терекли-Мектебте, Нариман, Карасу авылларында сол заманларда «Путь Ленина», Ленин атындагы совхозларында ийги куллыкшылардынъ бириси болган. Бальбектинъ ян косагы Оьлмес те Нариман авыл мектебининъ буфетинде куллык эткен. 1978-нши йылда яс аьел Карасу авылына кайтады эм Оьлмес «Шатлык» балалар бавында завхоз аьрекетин 20 йыллар бойы юриткен. Кайда ислесе де олар оьз исинде яваплык пан, куллык суьерлиги мен, нызамлыгы ман баскаланганлар. Кырда эм уьйдеги куллыкты да бирге этип келгенлер. Эм дайым исте де, яшавда да оьзлери коьрим болып, балаларында да, уныкларында да яваплыкты, алаллыкты тербияламага шалысканлар.
Буьгуьнлерде ис ветеранлары сыйлы тыншаювда болса да, бир куьн де куллыксыз олтырмайдылар. Олар яс несилин аякка салып, оларды аталыгына, аьелине пайдалы этпеге куьшлерин салып келедилер. Олардынъ куьезин уныкларынынъ исндеги, окувларындагы коьрсеткен уьстинликлери толтырып келедилер.
Олардынъ 4 аьвлетлери йогары билим алып, яшавда оьз орынларын таптылар. Адильхан увылларынынъ оьмири кыска болды. Руслан Ростов каласында йогары билим алган, Шешен Республикасында куллык этеди. Арслан Сургут каласында нефтегазда аьрекет этеди. Сылув кызлары Сыйлыхан балалар бавында тербиялавшы аьрекет исин юритеди. Айшат эм Мадина келинлери де оьз сайлаган кеспилери бойынша куллык этедилер. Баладынъ баласы балдан таьтли дейдилер, ногайда. Уныкларынынъ бириси Арсен юрист кесписин байырлаган, Буденновск каласында куллык этеди. Алан, Адильхан 3 эм 4 курста йогары окув ошакларында билим аладылар. Кишкей уныклары Алтынай, Айнара, Алима, Азиз, Хансултан мектебте, балалар бавында оьз етимислери мен атасы ман тетесининъ коьнъилин коьтерип келедилер.
Мине тезден татым аьелининъ тоьгерегинде Бальбек эм Оьлмес Арикбаевлер аьел туьзилгенли 50 йыллык мерекесин, алтын тойын белгилейдилер. Бу акылбалык, наьсипли аьел басларынынъ яшавы, коьрсеткен уьлгиси онынъ аьвлетлерине, уныкларына, авыл яшавшыларына коьрим болып келеди.
Узак аьел яшавынынъ сыхырлыгы менимше, бири бирине алаллык, сенимлик, суьйим болады. Эм солардынъ баьрисин де бу аьел баслары яшавында кулланып, наьсипке ашкыш этип келедилер. Узак оьмир сизге, коьримли аьел иелери! Яхшылыгынъыз узак болсын!
Г.Нурдинова.