Йыл сайын увыт айынынъ 2-синде Терекли-Мектеб авылдынъ А.Джанибеков атындагы орта мектебинде бу окув ошагын кутарганлар ман аьдетли йолыгыс озгарылады. Сол йолыгыс-байрам коьпте, совет йылларыннан алып уьзилмей, аз болса, яркынлы, куванышлы, эстеликли болып аьр кимнинъ эсинде узак заманга сакланады. Сондай йолыгыс, элбетте, мектебти биткен яска да, самайы агарган эсли аьдемге де аявлы. Олар таьтли бала шагыннан алып, бир мектебте, бир класста бир аьелдеги балалар кимик окып,ойнап оьскенлер. Тенъ-йолдасларынъ, абырайлы, билимли, аьрекетли окытувшыларынъ, оьсе келе юрек толкыткан, уялшанъ ян сезимлеринъ, кайбир мезгиллерде класс етекшилеринъ мен куьплесип олтырганда ашык боьлискен ой-мыратларынъ, тенъ-досларынънынъ енъил маскаралары, язлыктынъ емис бавындагы япалак ак шешекейлердей яркыраган уьмитлеринъ сагындай тизилисип эсинъде турады. Кайдай аьлемет умыткысыз шак!..

Индира Янакаева коьзге туьсетаган, оьзининъ терен билимин коьрсетип, соьйлеви мен аьдемди оьзине тартып, кызыксындырып болатаган окувшы. 

Индира Зекерья кызы Янакаева коьп республикалык, район эм оьзининъ тувган авыл орта школасында озгарылатаган шараларда катнасып, алдышы орынларды алып келеди. Янъыларда да Индира зональный кезегинде озгарылган Брейн-ринг ойынында катнасты, ол ортакшылык эткен куьп уьшинши савгалы орынга тийисли болган. Мунда авылдас районлардынъ балалары оьз куьплери мен катнастылар. 

Индира куьннен-куьнге оьз билимин теренлетип турады. Ога баьри зат та кызыклы. Ол оьз куьшин ДР бойынша озгарылатаган «Умники и умницы» деген интеллектуальлик ойынында да сынап келеди. Буьгуьнлерде ол соннан уьш медаль алып келген. Индира – ата-анасынынъ, Орта-Тоьбе авыл орта школасынынъ сеними эм диреги. 

Г. Сагиндикова. 

Биринши окытувшы! Ким оны суьйип эсинде сакламайды? Онынъ биринши дериси, биринши белгиси, биринши берген ятлавы. Онынъ орыны бек маьнели аьдемнинъ юрегинде, ойында, яшав йолды сайлавда демеге де болады. Солай ок Кадрия атындагы школасынынъ баслангыш классларынынъ окытувшысы Нурбике Оразманбетовна Кельдасовадынъ биринши окытувшысына каратылган суьйими эм сыйы кеспи сайлавына себеплик эткен. Онынъ биринши окытувшысынынъ аты да, атасынынъ аты да оьзиндикине келисли – Нур Оразманбетовна болган эм кызалак тептерине оьзининъ атынынъ орынына окытувшысынынъ атын язатаган болган…