Сыйлы Дагестан Республикасынынъ Халк Йыйынынынъ депутатлары Мурзадин Авезов, Мурат Мамаев, «Ногайский район» МР Депутатлар Йыйынынынъ, авыл поселениелерининъ депутатлары!

Ногай шоьллигинде 86 йылдан бери баспаланып туратаган тувган тилимиздеги «Шоьл тавысы» республикалык газетасына 2018-нши йылдынъ 1-нши ярым йылына язылув шагы кутылып барады. Миллет баспа органы сол шаклы заман узагында халкымыздынъ тилин, адабиатын, бай маданиятын оьрлентуьвге, тарихин уьйренуьвге, согыс йигитлигин эм ис етимислерин таралтувга салдарлы косымын этеди. Сизинъ аьр биринъизге халкымыз оьзининъ келеектегисин сенген, сонынъ ишинде газетамыздынъ бактысы да бар. Аьр биринъиз ногай тилиндеги газетасына язылувды оьзининъ миллет борышы деп анълап, бесер газетадан язылар деп сенемиз. Республикада ногай тилинде баспаланатаган сынъар газетады колтыкларсыз деп бек сенемиз. Кайда бизим ата-бабаларымыздан калган миллет сапатымыз деп белгили болган – патриотизм сезимлеримиз. Оьзинъиз де газетага язылып, соны ман бирге аьр биринъиз оьз сайлав участокларынъыздагы сайлавшыларынъызга да газетага язылмага шакырув этерсиз деп тилек саламыз. 2018-нши йылдынъ ярым йылына газетага язылув баасы редакциядан – 200 маьнет, почта боьликлериннен – 267 маьнет 72 каьпик (индекси 51365).

 «Шоьл тавысы» республикалык газетасынынъ редакциясы.

Аявлы район предпринимательлери, фермерлери, районымыздынъ учреждениелер эм организациялар етекшилери, савлай ногай халкымыз! Буьгуьнлерде ногай тилинде баспаланатаган сынъар «Шоьл тавысы» республикалык газетамызга язылув кампаниясы тамамланып туры. Болса да, бир неше организациялар, солай ок район яшавшылары, газетага аьлиге дейим язылганы йок деп айтпага боламыз. Сол зат кайбиримизди тынышсызландырады. Бизим газетамыздынъ бетлеринде мине неше йыллардан бери тек районымыздынъ яшавы тувыл, дуныяда яшайтаган баьри ногайлардынъ акында язылып турады. Редакцияга келген аьр бир аьдемнинъ биз коьнъилин таппага суьемиз, онынъ тапшырмасын толтырып, хош аламыз. Аьши не уьшин биз сондай явап оьзимизге алып болмаймыз? Ярым йылдынъ ишинде биз неше 200 маьнет те шыгарамыз, халкымыз уьшин, ана тилимизди саклар уьшин сол акшады берип болмаймыз ба?! Сондай зат бизим халкымызга келисли тувыл. Биз бу шакырувды сизге сеним мен язамыз. Республикамызда район еринде тек бизим «Шоьл тавысы» газетамыз шыгады, сога коьре ялгыз газетамызды коршалап та, ана тилимизди саклап та болайык. Тек сол заман халкымызда тил бирлик болар.

«Шоьл тавысы» республикалык газетасынынъ редакциясы.

Федераллык кавыфсызлык службасынынъ сыйлы куллыкшылары эм ветеранлары!

Сизди кеспи байрамынъыз – РФ кавыфсызлык органлар куллыкшыларынынъ куьни мен кутлаймыз! Сизинъ алдынъызга енъил болмаган борыш салынган – политикалык эм экономикалык тармакларында патшалыктынъ кызыксынувларын яшавга шыгарувга ярдамласув. Бу борышты толтырув уьшин сиз ерли власть эм ыхтыяр саклавшы органларынынъ структуралары ман тар эм етимисли кепте биргелесип ислейсиз. Спецслужбалардынъ маьнели ис аьрекети деп кыянатлыктынъ айлак та кавыфлы эм оьршиккен кеплери, боьтен де терроризм мен куьрес юритуьви саналады. Сизинъ пайдалы аьрекетинъиз эндигиден армаган да ортак исимизге, районымыздынъ оьрленуьвине косымын этеегине сенемиз. Сизинъ алдынъызга Россия Федерациясынынъ Президенти, патшалык эм ямагат салган борышларды уьстинликли кепте толтырувынъыз, Аталыгымызга алаллыгынъыз эм минсиз исинъиз, принциплигинъиз, йигерлигинъиз, кеспилик аьзирлигинъиз уьшин сизге разылыгымызды билдиремиз. Айырым кепте элимиздинъ эм районымыздынъ миллет кавыфсызлыгын канагатлав исине оьлшемсиз уьйкен уьлисин коскан ветеранларынъызга да муьсиревлимиз. Сизге берк ден савлыкты, наьсипти эм исинъизде янъы уьстинликлерди йораймыз!