Янъыларда Татымлык уьйинде терроризм эм дин экстремизм идеологиясына карсылык этуьвде гражданлар ямагатынынъ институтынынъ туткан орынына багысланган Ямагат палатадынъ пленарлык кенъеси оьтти. Мунда патшалык властининъ органларынынъ, муниципалитетлердинъ, коьлем билдируьв амаллардынъ, дин конфессиялардынъ ваькиллери эм аьлимлер катнастылар. Шарады ДР Ямагат палатасынынъ председатели Гамзат Гамзатов ашты.
–Терроризм эм дин экстремизм аьлиги дуныяда энъ де актуальли маьселелер болып каладылар. Бизим элимиз халклар ара терроризми мен куьреспеге уллы куьш салады. Терроризм эм экстремизм идеологиясына карсы турувда гражданлар ямагатынынъ институтларын, кенъ ямагатлыкты бавламай хайырлы сырагыларга келип болмаякпыз.
Дагестан Республикасынынъ Ямагат палатасы ман ямагат тынълавларда, конференцияларда терроризм эм экстремизм идеологиясына карсылык этуьв темасы аз каралмады. Патшалык власть органлары ман, муниципаллык билимлендируьв мен, дин аьрекетшилер мен белгиленген маьселе уьстинде уьйкен куллык юритиледи. Ямагат палатасынынъ агзалары студентлер мен йолыгысадылар.
Дагестан яслары шеттен карап турмайдылар, олар баьри шараларда белсенли катнасадылар. Сога шайыт болады республикамыздынъ Ямагат палатасы озгарган социаллык тергевлердинъ сырагылары. Биз республикадынъ 40 муниципалитетиннен 2000 аьдемге соравлар бердик. Олардынъ 90 проценти районынынъ ямагат яшавында,озгарылган саваплык акцияларда катнасатаганын белгиледилер. Биз, ясуьйкен несил, яслардынъ аваслыгына эс этпеге тийислимиз. Олар баьри берген борышларды толтырмага аьзир.
Бек маьнели терроризм эм экстремизм идеологиясына карсы турувда аьел баалыкларга таянув,-деди оьз соьзинде Г.Гамзатов.
Кенъес катнасувшылары ямагатта ислам дини бойынша билимлерин артырув ямагатта тил бирликти беркитуьвде бек маьнели экенин айттылар.
Шарада «Халк журналисти» конкурсынынъ енъуьвшилерине савгалар тапшырылды: айтпага, «Дагестанская правда» газетасынынъ корреспонденти А.Тажудиновага 1-нши дережели диплом эм 50 мынъ маьнет акша, «Дагестан»ГТРК корреспонденти Х.Нисредовага 2-нши дережели диплом эм 30 мынъ маьнет акша, «Эхо Москвы Махачкала» радио ваькили М.Бийгишиевке 3-нши дережели диплом эм 20 мынъ маьнет акша.
Тагы да мунда ДР Ямагат палатасынынъ ийги яктан оьзлерин коьрсеткен агзалары Сый грамоталар ман савгаландылар.
Н.Кожаева.