Дагестанга инвестициялар ман сенимлик керек

Оьткен 2018-нши йылда республикадынъ Предпринимательство эм инвестициялар бойынша агентствосынынъ ис аьрекетининъ сырагылары акында ведомстводынъ етекшисининъ куллыгын кесек заманга юритуьвши Гаджи Гасанов шыгып соьйлеген. Онынъ айтувы ман, Агентство савдады, предпринимательстводы, презентационлыквыставка аьрекетти колтыклав, инвестицияларды келтируьв эм тийисли ерине озгарып барув аьрекетинде патшалык политика шараларын аьзирлев эм яшавга шыгарув бойынша айырым куллыклар юритуьвин билдирген. Савда эм потребительлер рыногы тармагы акында айта келип, ол оьткен 2018- нши йыл бойынша статистика билдируьвлерин келтирди. Гасанов предпринимательстводы колтыклав эм оьрлентуьв ягыннан заьлимдей куллык юритилуьвин белгиледи. «Россия Оькимети 2019-ншы йылда экономикада киши эм орта предпринимательство пайы 23 процентке дейим, 2024-нши йылда болса, 32 процентке дейим артпага кереги акында борыш салган. Россия Федерациясынынъ Президентининъ «Россия Федерациясынынъ миллет ниетлери эм стратегиялык оьрленуьв борышлары акында» деген Указында 2024-нши йылга киши бизнес тармагында каьр шегетаганлар санын 25 миллионга дейим, сонынъ ишинде Дагестан бойынша 189 мынъ аьдемге дейим оьстирмеге кереги белгиленген. 2019-ншы йылдынъ 10-ншы канътар айына республикада 35 мынъ 526 киши эм орта предпринимательство субъектлери барлыгы эсапка алынган, ол сан былтыргы йылдынъ сол ок заманы ман тенълестиргенде 9 процентке эм 2017-нши йылдыкы ман тенълестиргенде 6,2 процентке артык болады», – деген Г.Гасанов. Агентство аьрекети бойынша оьз кенъеслери мен Дагестан Оькиметининъ Председателининъ биринши орынбасары Гаджимагомед Гусейнов боьлисти. «Биз аьли республика бюджетине туьзетуьвлер киргисттик эм, энъ баслапкы кезек пен, сонда «Дагестанды оьрлентуьв корпорациялары» деп аталган уставной капиталына 300 миллион маьнет акша взносы акында соьз бардырылады. Сол карыжлардынъ бас борышы – ол киши эм орта бизнеске косылма карыжлар беруьв. Тек бизге миллет проектинде бар болган коьрсетимлерге уьлисин косатаган дурыс кепте туьзилген бас коьрсетимлер керегеди», – деген биринши вице-премьер. Гусейнов солай ок Россия Федерациясынынъ субъектлерининъ аькимбасларынынъ куллыкларына белги беруьвши болып саналатаган бас коьрсетимлерге эс эттирди. Солар 15 негизли коьрсетимлерде язылып коьрсетилген. Мысалы, киши эм орта предпринимательство тармагында аьрекет этуьвшилер санын 189 мынъ аьдемге дейим арттырув керегеди. Коллегиядынъ сырагыларын келтире келип, регионаллык министрлер кабинетининъ етекшиси Артем Здунов йыйында маьнели темалар коьтерилгенин белгиледи. «Республика уьшин инвестициялар эм сенимлик айлак та маьнели. Инвестиционлык оьрленуьв агентствосы тек куры бир шакырувлары ман тувыл, ама колында керекли алатлары барлыгы ман белгиленмеге тийисли», – деп билдирген премьер. Савда тармагы акында айта келип, Оькимет етекшиси уьйкен кепли савда тармагын, рыноклардынъ исин оьрлентуьв бойынша кенъес берилгенин белгилеген. Онынъ соьзине коьре, бу тармакта баьри зат та аьруьв деп айтув дурыс болмайды. Сонда тийисли йорык йокка эсап, сонынъ уьшин МЧС службасы эм Роспотребсоюз бан биргелесип, комиссия туьзилген. Инвестиционлык проектлери акында айта келип, республика премьери янъы ис орынларын туьзуьв бас приоритет экенин анълаткан. «Биз эм Агентство уьшин маьнели борыш – ол республикада ис орынларды туьзуьв. Эгер аьдем куллыкшыларды кулланып, оларга кыйын ак тоьлеп, оьз ис аьрекетин ясырмай бажаратаган болса, сондай аьдемди колтыкламага, ога лизинг, субсидиялар, киши займлар бермеге керек болады. Биз аьдемлерди куллык пан канагатламага борышлымыз», – деген А.Здунов.