Ногай район орталыгы Терекли-Мектеб авылында Дагестан Республикасынынъ Али- бизим енъуьвимиз бек Тахо-Годи атындагы миллет музейининъ Ногай филиалынынъ янъы меканы шатлыклы аьлде ашылды. 

Сога багысланган митингти баслаятып, Дагестан ат казанган маданият куллыкшысы Сабират Абубекерова бизим музейдинъ тарихи узактагы 60-ншы йылларда А-Х.Джанибеков атындагы орта школадагы кишкей уьлке танув музейиннен басланганын эм сонынъ негизин халкымыздынъ данъклы тарихшилерининъ эм ямагат аьрекетшилерининъ бириси, алдынгы СССР эм РФ Географиялык ямагатларынынъ Ногай боьликлерининъ аьлим-секретари Бальбек Аджибайрам увылы Кельдасов салганын айырым кепте билдирди. Сонъында 1993- нши йылда ногай уьлке танув музейи республикалык А.ТахоГоди атындагы миллет музейининъ филиалына айланган. Ога коьп йыллар солай ок сонынъ директоры Каирбек Бальгишиев етекшилик эткен. Куванышлы шарада ДР Маданият министрининъ куллыгын юритуьвши Зарема Бутаева, ДР А.Тахо-Годи атындагы миллет музейининъ генераллык директоры Фахрудтин Магомедов, ДР Халк Йыйынынынъ депутаты Алибек Мурзаев, Ногай район етекшилери эм яшавшылары катнастылар. Сыйлы конакларга эм йыйылган ямагатка Ногай район администрациясынынъ басшысы Джамалутдин Эсиргепов йылы салам соьзин айтты. Оьз соьзинде ол халктынъ тарих-маданият асабалыгын саклавга эм маданият учреждениелерин колтыклавга ярдамын этуьви уьшин ДР Маданият министрининъ куллыгын юритуьвши Зарема Бутаевага, ярастырув ислерин юритуьвшилерге, музей куллыкшыларына разылыгын билдирди. Оьзининъ кутлав соьзинде ДР Маданият министрининъ куллыгын юритуьвши Зарема Бутаева буьгуьнги куванышлы шара ол бизим аьр биримиз уьшин эстеликли деп белгиледи. – Биз «Аьел» деген миллет проектинде катнасувымыз эм федераллык ярдамы аркасы ман эндигиси бу янъы меканга коьшуьвди байрамшылаймыз. Ак юрегимнен баьри район яшавшыларын кутлайман. Буьгуьннен алып музейдеги аьдетли экспонатлары, ногай халкынынъ тарих йылязбалары эндигиси алдынгыдан йогары дережеде коьрсетилинип тураяк. Эм солар баьриси де ортак дагестан маданият асабалыгынынъ айырылгысыз кесеги боладылар. Школадагы кишкей музейден бу учреждение буьгуьнлерде оьзининъ фондында 2 мынъга ювык экспонатлары йыйылган музейге дейим оьскенин белгилемей болмайман, – деди ол. Зарема Бутаева Дагестан тарих эм маданият асабалыгын саклавга эм уьйренуьвге хыйлы косымын эткени уьшин филиал куллыкшысы Феруза Манкаевага, сонынъ етекшиси Зульфия Отаровага эм ТереклиМектеб авыл басшысы Марат Кулунчаковка Разылык хатлар тапшырды. Шатлыклы куьн мен баьрисин де солай ок ДР миллет музейининъ етекшиси Фахрудтин Магомедов та кутлады. Ол филиалдынъ янъы меканы ярастырылувы уьшин разылык соьзлерин Ногай район администрациясына эм Россия маданият министерствосына каратты. Ф. Магомедов кыска заман ишинде район басшысынынъ тилеги мен туьнегуьнлерде буйырык шыкканы эм сога коьре бу музей меканына коьримли аьрекетши Бальбек Кельдасовтынъ аты берилгенин билдирди. Баьри конакларга эм район етекшилерине разылык билдируьв соьзи мен шарадынъ ызында музей филиалынынъ етекшиси Зульфия Отарова шыгып соьйледи. Ол музей филиалынынъ тарихи, сонынъ етекшилери эм куллыкшылары, экспонатлар фондлары акында хабарлады. Муннан сонъ музей куллыкшылары янъы меканга сыйлы конакларды, халкты киргистуьв уьшин бурынгы ногай аьдети эм ийги миллет ырымы ман босагага ак кийгизди тоьседилер. «Ак кийгиз уьсти мен, ак ниетимиз бен хош коьремиз баьринъизди де бизим музейдинъ янъы меканына!» – деп киргистти йыйылган ямагатты меканга шарады юритуьвши Сабират Абубекерова.

 М-А.Ханов. Суьвретте: шатлыклы шара.