Аьр йыл 4-нши ноябрь куьнинде Россия Халк бирлигининъ куьни деп аталган патшалык байрамын белгилейди. Бу байрам бизим эсимизге халк тыпаклыгы элимизге энъ де авыр сынавларды басымыздан оьткермеге ярдам этуьвин салады. Сонынъ тарихи эректеги XVII оьмирде болып оьткен оьзгерислерден басланады. Сол 1612-нши йылдынъ куьзинде Кузьма Минин мен Дмитрий Пожарскийдинъ халк ополчениеси баскыншылардан Москвады босаткан. Соннан бери бирликтинъ идеясы сол заманлардан алып, Уллы Аталык согысы йылларына эм оннан сонъ да бизим куьнлерге дейим кызыл йол ман оьтип келеди. Бу уьш яшавдан алынган мысаллар биз тек баьримиз бирге халк пан енъуьвге етиспеге болатаганымызды коьрсетеди. Аьлиги заманларда патшалыгымыз тагы да оьз кавыфсызлыгын эм баалыкларын коршалавга коьтерилгенде, россия аьскерлери согыс спецоперациясын юритип турган заманда сондай тарих дериси айлак та маьнели. Халк бирлигининъ куьни Россиядынъ аьлиги заманындагы календаринде янъы байрам болып саналады, тек сонынъ тамырлары терен. Бу куьн 1612-нши йылда гражданин Кузьма Минин мен князь Дмитрий Пожарскийдинъ етекшилиги астында халк ополчениеси поляк-литов баскыншыларыннан Москвады босатып, Канъгыма заманга токтав белгисин салган оьзгерислерге эстелик эсабында беркитилген. Сол байрамнынъ бас маьнеси – Россиядынъ коьпмиллетли халкынынъ тыпаклыгын, онынъ капы туьбине келген кавыфлыклар алдында бирлесип болатаганын эм эл мен бирге уллы ниетлерге етисип болувын белгилев. Соны ман Халк бирлигининъ куьни буьгуьнлерде эки уьйкен маьнеди шайытлайды. Бир ягыннан – ол баьтир бурынгы заманларга сый-оьрмет этуьв, халк бирлиги элимизди оьлимнен аман калдырганы акында тарих дериси болады. Баска ягыннан – ол аьлиги заманларда да ямагат бирлеспеге болатаган баалыкларымыз: патриотизм, гражданлар макулласувлыгы, халк дослыгы акында эске салув. Келеяткан Россия Халк бирлигининъ куьни мен байланыста баьри газета окувшыларымызды, аьр бир аьдемди кутлаймыз. Баьрине де тынышлыкты, эмишликти, исинде эм окувында уьстинликлерди, бизим уллы Тувган Элимиз эм сонынъ эркинлиги, илгери оьрленуьви уьшин бирлесуьвди йораймыз! Бизим бирлигимиз халкымызды аьр заман да енъуьвлерге еткерген!

 М.Юнусов.