Буьгуьнлерде Элимиз авыр заманларын оьтеди. Россиядынъ аьскершилери кайтадан басын коьтерип баслаган неонацизмнен тынышлыкты коршалавга коьтерилдилер. Согыс спецоперация беркликке, шыдамлыкка, берген антына алал болувга тергеп, коьплеген россия аьеллерин сынап келеди. Аталыгымыздынъ коьплеген йигитлерининъ яшавлары 2022-нши йылдынъ увыт айынынъ 24-нши куьниннен алып «ога дейим» эм «сонъ» дегенге боьлинди. Халкларымыздынъ тарихинде орын тек сынавларга тувыл, йигитликлерге де табылды. Йигитлик коьрсеткен аьдемлер, куьндегилик яшавда данък акында ойланмай, тек оьз алдына салынган согыс борышларын яваплы толтырып келедилер. Яс несили де сондай коркынышсызлыктынъ уьлгисинде, патриотлык сезиминде тербияланады. Яшавын аямай, Элин коршалавга турганлардынъ бириси болады йигерли ердесимиз Арсен Эдилбиевич Нургушиев. Арсен 1983-нши йылдынъ караша айынынъ 4-нши куьнинде Ногай районынынъ Калинин авылында тувып оьскен. Онынъ яшав йолы оьз тенълериннен эш бир зат пан да баскаланмай озды – баслап балалар бавы, оннан сонъ мектебте билим алув, юреги мен сайлаган кесписин байырлав эм аьскер сырасында етимисли кызмет кылув. Ол парахат касиетли, йигерли яс болып оьсти, бала шактан куллыксуьерлиги мен баскаланды. Досларына Арсен кыйынлыкта биревди де калдырмаган, ога дайым сенмеге болатаган алал тенъ де болып келди. Кыйынлыклар алдында арт кайтпай, оьзине яваплылыкты алып, тек алдыга барув – ол онынъ касиетининъ энъ ярык бети эди. Арсен Нургушиев, Элининъ тынышлыгын коршаламага заман еткенде, оьз сайлавын этти. 2023-нши йылдынъ казан айынынъ 1-нши куьнинде Россия Федерациясынынъ Коршалав Министерствосы ман контракт беркитип, оьз яшавын элининъ кызыксынувларын коршаламага ниетин билдирди. Толы аьзирликлер оьтип, ол согыс спецоперация юрген ерге йолланды. Штурмлав ротасынынъ взвод командирининъ орынбасары эсабында Арсен Эдилбиевич Луганск бетте яваплы эм яшавга кавыфлы болган алдына салынган согыс борышын – яралы эм ян берген йолдасларын дав майданнан белсенли шыгарып, етимисли толтырып келген. Соьйтип ол оьз яшавын аямай, согыс йолдасларын ялынлы оттынъ астыннан аман эсен куткарып келди. Алдына салынган борышларын толтырувда коьрсеткен йигитлиги эм коркынышсызлыгы уьшин ердесимиз II дережели «За храбрость» медалине де тийисли этилген. 2026-ншы йылдынъ канътар айынынъ 23-нши куьнинде Закотное авыл еринде озган каты урысларынынъ бирисинде мотострелковый боьлик командири, ротасынынъ взвод командирининъ орынбасары, оьз согыс йолдасларына «Усман-05» деген позывнойы ман таныс болган Арсен Нургушиев пен байланыс уьзилди, коьп кетпей, сесхабарсыз йок болган деген сувык хабар ювыкларынынъ юреклерин дертке толтырды. Ол, оьзиннен сонъ тек кардашювыкларынынъ юреклерин босатып кетпей, ога сый эм борыш дайым биринши сырада болган аьдем акында ярык эстеликти оьмирлерге калдырды. Арсен касындагыларга коркынышсыз аьскерши деп таныс эди. Ердесимизди оьз боьлигинде, онынъ баскалардынъ аркасы артында бир де тыгылмайтаган касиети уьшин бек сыйлайтаган эдилер, неге десе энъ авыр эм каты урыслардынъ энъ маьнели шагында «Усман-05» деп белгили болган ердесимиз дайым бириншилер сырасында турган. Онынъ алдына салынган кайсы согыс борышы да яваплы эм йогары оьлшемде толтырылып келди. Согыс йолдасларына ол уьлгили коьрим эди, командирдинъ артыннан ялынлы йолларын оьтип, Енъуьвди бирге ювыклатып келгенлер. Ама аьскершидинъ сувык шырайынынъ артында ата- анасын исси суьйген увыл, юрегинде йылы сезимлерин саклаган ян косак эм аьвлетлерин аявлаган ата ясырынган эди. Уьйде онынъ келуьвин аьсиретли энъ ювык аьдемлери: ата-анасы Эдилбий эм Зарбике, ян косагы Зульфира, кызы Луиза эм уьш ясындагы увылы Усман сакладылар. Оларга Арсен сеним эм тирев болып келди. Кардаш-тувганлары неше айлар бойы онынъ келуьвин аьсиретли сакладылар. Олар, аьр бир амалга тармасып, оны ман болган аьл – ол янъылыс деп, сенимлерин соьндирмей сакладылар, занъ согылар яде суьйинишли хабар келер, эм Арсен уьйге аман-эсен кайтар деп уьйкен сеним мен яшадылар. Ама бакты оьзинше буйырды. Аьелге сол йойым бек авыр сынав эди. Каты урысларда коьрсеткен йигитлиги эм коркынышсызлыгы уьшин Арсен Эдилбиевич Йигитлик ордени мен (ян бергеннен сонъ) тийисли этилди. Аьскерши 2026-ншы йылдынъ сары тамбыз айынынь биринши куьнинде тувган еринде койылды. Огырсыз согыс кайратлы, куьшкуватлы эм келеекке уьйкен мыратлары болган ясларды, энъ яваплы шакта оьз Элин коршалавга турмага коркпаган шынты патриотларын дайымга бизден аькетеди. Олар дайым да бизим эсимизде. Йигитлик – оьлимсиз! 

Г.Нурдинова. Суьвретте: Арсен Нургушиев.