24-нши октябрьде Ногай район орталыгынынъ Терекли-Мектеб авылындагы Кадрия атындагы паркында тереклер олтыртув бойынша коьлем акция оьткерилди. Сол исти баславшы эм сонда оьзи де белсен катнасувшы – Дагестан Республикасынынъ иш ислер министри Абдурашид Магомедович Магомедов. 

Сога аьзирлик Ногай районы бойынша Россия МВД етекшиси Ислам Турлавовтынъ аьрекети мен эки ай узагында юритилген эди. Полиция куллыкшылары парк ишинде 1,2 гектар ерлерди терек олтыртувга аьзирледилер. Акция басланатаган куьн полиция куллыкшылары ман бирге тереклерди олтыртувда йогарыда белгиленген ДР Иш ислер министри Абдурашид Магомедов пан бирге Ногай район администрациясынынъ аькимбасы Джамалутдин Эсиргепов катнастылар. Баьриси сол куьн парк ишине 1160 карагай тукымлы тереклер олтыртылды. Шарада республикадынъ туьрли районларыннан келген 250 МВД куллыкшылары, солай ок ерли власть эм куьш структураларынынъ ваькиллери: Ногай район Депутатлар йыйынынынъ председатели Алибек Менласанов, Ногай район прокуроры Батыр Насимов, Ногай район судынынъ председателининъ куллыгын юритуьвши Эльдар Телемишев эм Тарумов район судынынъ председатели Элеонара Кудинова, Ногай районы бойынша УФСБ 3-нши боьлигининъ начальниги Шамиль Боранбаев, Терекли-Мектеб авыл администрациясынынъ аькимбасы Марат Кулунчаков ортакшылык эттилер. Уйгынлав эм орманхозяйстволык ягыннан Ногай район лесничество директоры Феруза Дикинова ийги ярдамын этти. Абдурашид Магомедов бу ис республикага эткен косымы уьшин Ногай районына разылык эсабында уйгынланувын билдирди. Соны ман бирге акция – ол тек терек олтыртув иси тувыл, соны ман бирге ол тири разылык пан берк дослыктынъ белгиси экенин белгиледи министр. Дагестан Иш ислер министерствосыннан Ногай районына мемориаллык плитасын ашув шарадынъ маьнели оьзгериси болды демеге керек. Соны ашпага сыйлы ыхтыяр ДР Иш ислер министри Абдурашид Магомедов пан Ногай район администрациясынынъ басшысы Джамалутдин Эсиргеповка тапшырылды.

 Куллыктынъ тамамында министр сонда катнаскан баьрисине де разылыгын билдирди. «Буьгуьн биз мунда тек тереклер олтыртпаймыз – биз мунда аьдемлерге ийги яшамага, балаларга кыдырмага, уьйкенлерге ис куьннен сонъ тыншаймага онъайлык туьземиз. Бу акция – иш ислер органлары, ерли власть, лесничество эм яшавшылар кайтип бирге тыпак кепте куллык этпеге болувынынъ яркын коьрими. Мунда терек олтырткан аьр ким де Ногай районында оьз янынынъ бир кесегин калдырады», – деди Абдурашид Магомедов. Муннан сонъ ДР МВД атыннан разылык хатлары Ногай лесничество директоры Феруза Дикиновага, питомник директоры Рашид Бакиевке, артезиан казувшы Казбековка, Гуниб район лесничествосы Исмаил Исмаиловка эм баскаларга тапшырылды. Соны ман бирге ДР бойынша Россия МВД атыннан Сый грамоталары ман Заур Багандов, Равиль Кашанов, Кайтарбий Калдасов,Темирлан Савкатовка, Джалиль Куруптурсунов савгаландылар. Сол куьн республикадынъ туьрли ерлериннен келген оьрметли конакларды парк янында курылган термелер ишинде аьдетли ногай шайы, катлама, бавырсак эм миллет асларынынъ бириси куьрлеме мен сыйладылар. 

Суьвретлерде: тереклер олтыртув аьсеринде; Ногай район етекшиси Д.Эсиргепов эм ДР Иш ислер министри А.Магомедов.