Ногай районымызда «Балады мектебке аьзирле» деген аьдетке кирген акция оьтеди. Сондай ийги исте баьри учреждениелер де ортакшылык этедилер. Сол санда «Ногайский район» МО-сындагы ДР УСЗН ГКУ-да бар.
Организация етекшиси Багаутдин Тангатаровтынъ билдируьвиннен:
– Бу ийги социаллык ис янъы окув йылы алдында колайсыз, коьпбалалы, солай ок согыс спецоперациясынынъ катнасувшыларынынъ аьвлетлерине уьйкен коьмек болады.
Белгилеп озайык, Янъы окув йылы басланмага санавлы куьнлер калганда, Управление куллыкшылары ман Терекли-Мектеб, Карасу эм Карагас авылларыннан уьш аьелдинъ окувшы балаларына акшалай ярдам этилди. Аьр бир аьел агзасы ман йолыгысып, олардынъ саьбийлери тийисли аьлде мектебке аьзир болып барсын деген ниет пен, УСЗН куллыкшылары «ийгилик конвертин» тапшырдылар.
Бу этилетаган ис бек яхшы деп саналады эм аьр бир аьел бизим ямагатка баалы экенин коьрсетеди – мырсатларга карамастан, биз бир-биримизге ярдамга келип болатаганымыздынъ шайыты да болады.
Белгиленген акция бу йыл да бек йылы аьлде оьтти. Акция бойынша ярдам этилген аьеллер мен йолыгыслар ийги соьзлерге, ак юректен айтылган разылык соьзлерге бай эди. Управление куллыкшылары окувшыларга караткан соьзлеринде – тек ярык наьсипли яшав, аьр бир аьелде тынышлык, согыс спецоперациясында оьз борышларын толтырып юрген аьел баслары уьйлерине сав-эсен кайтсын деген йоравлар да айтылдылар. Баьримиз де сенемиз, сол йоравлар тезден яшавга шыгар деп.
Биз йогарыда белгилеген акцияда УСЗН куллыкшылары ман бирге «Единая Россия» партиясынынъ агзасы Алибек Арифуллаевич Мурзаев, Ногай районы бойынша «Защитники Отечества» патшалык фондынынъ социальный координаторы Аскерхан Межитов, Ногай ра- йонымыз бойынша «Память гор» ямагат организациясынынъ ваькили Р.Мустафаев ортакшылык эттилер. Олар «село Терекли-Мектеб» СП МО администрация меканында СВО катнасувшыларынынъ биринши класска баратаган тогыз баласына мектебте керекли затлар ман портфельлер савгаладылар.
Алибек Арифулла увылы биринши кере мектеб эсигине абыткылаяк, биринши кере партага олтыраяк саьбийлерге окувда тек уьстинликлер йорады.
Г. Курганова.