Буьгуьнлерде авыл хозяйство тармагы яде агропромышленность комплекси – элимиздинъ, сонынъ санында республикамыздынъ эм районымыздынъ экономикасынынъ энъ маьнели тармакларынынъ бириси.
Ногай районымыз кайсы заманларда да малшылык, эгиншилик, бав-бакша продукциясын оьстируьв эм болдырув яктан дайым да аьрекетли динамикады коьрсетип келген. Аьлиги куьнлерде де район фермерлери эм байыр ярдамшы хозяйстволары оьз ер участокларында тувар мал, койлар эм эшкилер, атлар асырайдылар, бийдай, арпа, сулы, емис, ясылша оьстируьв мен каьр шегип, патшалыгымыздынъ азык-туьлик канагатланув программасын яшавга шыгарып турадылар.
Быйыл районымыздынъ аслык оьстируьвшилери 10003 гектар ерлерде куьзлик бийдай шашып, соннан баьриси 35010 тонна онъыс йыйып алганлар. Аьр бир гектардан орта эсабында 35 центнер аслык болдырылган. Куьзлик бийдайды район еринде фермерлер Солтанат Аджигайткановадынъ, Кайтарбий Биймурзаевтинъ, Мурзадин Карамурзаевтинъ, Фазиль Мансуровтынъ, Махмуд Акмурзаевтинъ, Маутали Куванаевтинъ, Феруза Байрамовадынъ эм баскалардынъ эгинши-фермер хозяйстволары йыл сайын да оьстиредилер.
Район еринде аьр йылда да язлык арпа культурасы шашылады. Соьйтип быйыл район бойынша 3655 гектар ерлерге язлык арпа шашылып, соннан 10965 тонна йыйылып алынган яде аьр бир гектар орта оьлшемде 30 центнер онъыс берген.
Сулы культурасы болса, районымызда баьриси 1000 гектар кырлардан 3000 тонна болдырылганы эм аьр бир гектар 30 центнер онъыс бергени белгиленген.
Район бойынша солай ок быйыл ералма 130,7 гектар майданлардан баьриси 1764 тонна йыйылган.
Бакша культураларын 2007 гектарда оьстиргенлер быйыл ишинде толайысы 40140 тонна онъысын йыйып алганлар.
Район фермерлерининъ коьбиси малшылык пан каьр шеккени мен байланыста келеяткан кыс айларына деп савлайы 65500 тонна пишен эм 10 мынъ тонна тобан аьзир эткенлер.
Куьнбатар авыл яшавшысы, эгинши-фермер хозяйствосынынъ басшысы Ашим Озганбаев 16 гектардан артык кырларда емис тереклерин оьстируьв мен каьр шегеди. Аьлиги заманга ол 8,5 гектар ерлериннен онъыс йыйган, сонынъ ишинде 6 гектардан 108 тонна коьгем, 1,5 гектардан 27 тонна кертпе, 1 гектардан 18 тонна алма яде баьриси 153 тонна емис продукциясын болдырган. Онынъ хозяйствосында эндиги де калган гектарлардан емис йыюв ислери бардырыладылар.
Буьгуьнлерде район эгиншилери куьзги бийдай шашув ислерине кирискенлер. Баьриси быйыл келеяткан 2027-нши йылдынъ аслык онъысына деп район бойынша 9600 гектар ерлерде куьзлик бийдай урлыгы шашылмага каралады.
Аьлиги енъил болмаган заманларда элимиздинъ эм сонынъ санында районымыздынъ агропромышленность комплекси халкымыздынъ азык-туьлик кавыфсызлыгын канагатлав яктан борышларды уьстинликли аьлде шешип келеди. Келип турган ис байрамы ман байланыста республикамыздынъ эм Ногай район авыл хозяйство куллыкшыларын ак юректен кутлаймыз, оларга берк ден савлыкты, исинде уьйкен уьстинликлерди, бай онъысларды, уьй берекетин эм илгери оьрленуьвди йораймыз!
М-А.Ханов.