Янъыларда республикамыздынъ бас каласындагы «Россия – меним тарихим» музей комплексинде согыс спецоперациясына багысланган «Знание. Герои» деп аталган уьйкен оьлшемли ярыкландырув проектининъ шатлыклы ашылувы болды.
Бу проект Дагестаннынъ илми эм билимлендируьв министерствосынынъ колтыклавы ман «Знание» Россия ямагаты ман яшавга шыгарылды. Онынъ бас мырады – согыс спецоперациясынынъ йигерли баьтирлери акында хабарлав.
Выставка мультимедийный кенълигинде он бир туьрли тематикалык залларда коьрсетиледи.
Проект авторлары айырым аьдемлердинъ тарихлеринде токтасканлар–десантниклер, танкистлер, летчиклер эм аьскерши медиклер. Маьнели эс дагестанлы йигитлердинъ коьрсеткен баьтирлигине этилген.
Шарадынъ шатлыклы ашылувында власть органларынынъ ваькиллери, дин аьрекетшилер, ямагат эм ветеран организациялары ортакшылык эттилер.
Сыйлы конаклар ишинде Россия Баьтири Хантемир Султанов та бар эди. Йыйылганлар алдында соьйлеген Дагестан парламентининъ вице-спикери Елена Павлюченко мундай шаралардынъ бек уьйкен маьнеси бары акында айтты.
– Сиз буьгуьнлерде уьйренмеге эм кимге усамага болатаган аьдемлер болганына оьктемсимеге керексиз. Баьтир болып бирев де тувмайды, сонъында сол атты казанмага болады. Сиз Баьтир аьдем мен соьйлей келе анъларсыз, олар эткен йигитликти оьзлери уьшин тувыл, оьзлерининъ тувганлары эм ювык аьдемлерин ойлап этедилер. Аталыкка суьйим тек йигитликте тувыл, соны аьдемлер келеектегин ойлап, этпеге болатаганы акында. Буьгуьнлерде элдинъ келеектегиси бизим колларымызда,– деди ол.
Шара барысында соьйлегенлер аз тувыл эди. Сол сырада ДР билимлендируьв эм илми министрининъ исин толтырувшы Яхья Бучаев те бар эди.
– Бу проект цифровой эм физический кеплерди бириктиреди: аьр бир зал – аьдем бактысы, йигитликтинъ тарихи, берген аьскерлик антына алаллык. Экспозиция ызгы йыллардынъ оьзгерислерин аьдем бактысы аркалы коьрмеге амал береди. Сол зат яс несилди тербиялавда уьйкен орынды алады, – деп соьзин бардырды ол.
Биринши болып, экспозицияды яслар козгалысларынынъ активистлери коьрдилер.
«Знание» Россия ямагаты ман «Знание. Герои» проекти савлай элдинъ субъектлеринде яшавга шыгарылмага ниетленеди эм сол аркалы яс несилди тербиялавга косым этилер деген сеним де тувады.
Дагестан Республикасында выставка казан айынынъ ызына дейим болаяк.