Тувган газетамыздынъ 95-йыллык мерекеси де етип калды. Тек туьнегуьн биз онынъ 90 йыллыгына макалалар аьзирлегендей эдик. Соьйтип заман аявсыз алгасайды алдыга, оьтедилер йыллар, йыллар ман бирге кетедилер бизим арамыздан аявлы аьдемлер де. Бу куьнлерде газетамыздынъ кезекли мерекесин белгилевге аьзирлик коьреятып, онынъ тарихине уьлис коскан аьдемлерди эсимизге аламыз, оькинишке, олардынъ коьбиси бизим арамыздан кеткен. Аьдемлердинъ кетуьви бек авыр, а яслай, яшавынынъ яйнап турган шагында кетсе, эки кайта авыр болады. Солардынъ сырасында бизим танъ юрекли эм кайсы исти де юритип болган ис йолдасымыз Аминат Хасанбий кызы Каракаева. Аминат Каракаева Нариман авылында сый-абырайлы Хасанбий мен Базинет Янбаевлердинъ аьелинде тувган. Кызалактынъ бал татыган балалыгы, мектеб йыллары да сол авылда озган. Авыл мектебин уьстинликли тамамлап, Аминат Карашай-Шеркеш педагогикалык университетининъ баслангыш класслар факультетине окымага туьседи. Уьйинде ийги тербия алган эм Кудай ман янына каьмбиллик синъдирилген яс кыздынъ аты мектеб эм йогары окув ошакларында окытувшылары эм йолдаслары ман тек ийгилик пен айтылатаган болган. (Ийгилик пен айтылады аьлиге дейим де эм аьр дайым да соьйтип айтылар онынъ аты бизим редакция куллыкшылары ман да.) КарашайШеркеш педагогикалык университетинде окыган заман ол оьзининъ бактысы – Вазирхан Юмав увылы Каракаев пен йолыгысады. Йогары окув ошагын кызыл дипломга тамамлаган йыл, Аминат сол яс пан янъы аьел курады. Шоьлде тувган Аминат Кобан ерининъ келини болып, ян йолдасынынъ кардашларына уьйкен сый этип яшайды. Ис аьрекетин яс кыскаяклы Карашай-Шеркеш Республикасынынъ китапханасында библиотекарь болып баслайды. Китапханада онынъ билимин, куллыксуьерлигин коьрип, алдышы библиотекарь этип саладылар. Бу ис орынында Аминат ети йыл етимисли исин бардырады. Сол йылларда яс кыскаяклы катнасувшыларынынъ эслеринде коьпке сакланган кызыклы шаралар уйгынлайды. «Шоьл тавысы» республикалык газетасынынъ редакциясына Аминат Хасанбий кызы 2013-нши йыл келди. Мунда ол кайсы исти де йогары усталык пан толтырып болды. Ол баслап, газета дизайнери ис орынында куллык этти, сонъ, газетамыз электронлы кебинде болганда, сайт редакторы этип беркитилди. Сайт редакторы этип беркитилген сонъ, Аминатка куллыктан уьйине кайтканнан сонъ да тыншаюв йок эди, ол кешеси, куьндизи мен сайтка материаллар токтавсыз салып туратаган эди. Онынъ акында мага озган заманда язбага бек кыйын болады. Аминаттынъ йылы куьлемсиреп турган келбети коьз алдымда турады. Ол бир де биревге де, каты соьз айтып, юрегине авыр этпеген, аьр дайым да куллыгынынъ коьплигине карамастан, сабыр аьлде янасып, оьзи билгени мен боьлискен. Аминаттай аьдемлер оьзлерининъ юрегиндеги йылувлыгын тоьгеректегилерге аямай савкатлайдылар. Ондай аьдемлердинъ касында яшавдагы териссизликлерди эм ялганлыкты мутып, шынтылыкка сенесинъ. Кайдай аьдем эм кайдай ана эди бизим Аминат. Ол кайтип балаларын коршалайтаган, кайтип олар акында каьр шегетаган эди. Яшавынынъ ызгы айларында ол Москва каласында эмленеяткан увылынынъ касында болды, оьзининъ авырувы акында да ойланмады, тек аьзиз баласына коьмек эм енъил этпеге уьлгирмеге суьйди. Аминат дуныядан кешкен 2021- нши йылдынъ ызы бизим савлай редакция ис коллективине, бек авыр йыл эди, декабрь айында бизим эки ис йолдасымыздынъ яшавын авыр мараз уьзди. Мен уьшин сол ай боьтен де авыр болды, неге десе олар меним тек ис йолдасларым тувыл, ювык аьдемлерим эдилер: биреви – атам Магомет Кожаев, Аминаттынъ да мага кардашлыгы бар. Каранъадан сонъ, танъ аткан, сувык кыстан сонъ язлык келген кимик, яшавдагы авыр куьнлерден сонъ, ярыклык та келеди. Яшав барады алдыга. Аминаттынъ балалары да анасын дайым да юрегинде саклап, яхшылыкка сенедилер. Янъыларда бизим савлай редакция ис коллективи Аминаттынъ Фазиль увылынынъ аьел курув наьсибин боьлисип, тойында болды, балаларына карап куванды. Коьз алдымызда оьтти Аминаттынъ редакцияда ислеген, газета исине уьлис коскан йыллары. Замансыз арамыздан кеткен ис йолдасымыз бизим аьр биримиздинъ эсинде яшайды, онынъ сав заманда аьр биревге эткен яхшылыгы балаларына кайтсын деген тилек этемиз. Нурият Кожаева. Суьвретте: А.Каракаева.