Озган юмадынъ ишинде Дагестан Республикасынынъ Халк йыйыны маьнели ис орынларга кандидатураларды беркитти. Сол бизим республикамызга, бизим районымызга уьйкен оьзгерис болады. Баьримизге де ердесимиз Алибек Арифулла увылы Мурзаев ДР Халк йыйынынъ Коррупцияга карсы турув эм регламент бойынша Комитетининъ председателининъ орынбасары этилинип беркитилгени суьйинишли хабар болды. Алибек Мурзаев – элимиз, республикамыз, районымыз бойынша баьрисине де таныс аьдем, онынъ сулыбы, ерли аьллерди билуьви савлай Дагестаннынъ онъайлыгына каратылган исинде тирев болар. Алибек Арифулла увылынынъ аьрекети кайбир яшавшыга ювык актуальли соравларды шешуьвде законлыкты беркитпеге демевлик этер. Биз шекленмеймиз: бизим халкымыздынъ ваькилининъ йогары кеспилиги эм яваплылыгы республикамыздынъ, сонынъ ишинде Ногай районы да, оьрленуьвине сенимли негизи болаяк. Бу оьзгерис ортак ийги туьрленислерге берк абыт болсын – аьр бир аьелдинъ, авылдынъ, тувган еримиздинъ онъайлыгына. Алибек Мурзаевтинъ бас ниети – халкымыздынъ сенимин акламага, республикамыз оьрленсин деп куллык этпеге. Сол ниетине ол еткенин йорап, ердесимизди ис орыны ман кутлаймыз эм коьп ийгиликлер, уьстинликлер йораймыз.

 А.Межитов, Ногай районынынъ Билимлендируьв управлениесининъ етекшиси.