Ногай район администрациясында «Ногайский район» МР Депутатлар йыйынынынъ кезексиз 12-нши сессиясы болып оьткен.

Сессияды район Депутатлар йыйынынынъ председатели Алибек Менласанов юриткен. Сонынъ куллыгында район депутатлары, Ногай район Ямагат палатасынынъ председатели Эльмурза Саитов катнасканлар. Район депутатларынынъ бас форумынынъ маьнели соравларынынъ бириси деп карар алмага ыхтыяр беретаган тавысы болган кандидатурады Дагестан Республикасынынъ Сайлав комиссиясынынъ сырасына коьрсетуьв соравы белгиленген эди. Россия Федерациясынынъ эм Дагестан Республикасынынъ законлары негизинде район депутатлары Дагестан Республикасынынъ Аькимбасына ДР Сайлав комиссиясына Надия Битуллаевна Селимхановадынъ кандидатурасын (1982-нши йыл тувган, ерли самоуправление органлары ман ДР Аькимбасынынъ ишки политика эм ерли самоуправлениеси бойынша комплексли мониторинг управлениесининъ биргелесип ислев бойынша боьлигининъ начальниги) коьрсетуьвге карар алдылар. Бу бас соравдан баскалай, депутатлар солай ок район яшав аьрекети уьшин маьнели бир неше соравларды да ойластылар. Районнынъ Ямагат палатасынынъ председатели Эльмурза Саитов сессия катнасувшыларына Дагестан Республикасынынъ Ямагат палатасында быйыл 22-нши октябрь куьнинде болып оьткен кенъесуьвдинъ сырагылары акында хабарлады. Сол шарада коьшимли малшылык ерлеринде туьзилген авылларга авыл статусларын беруьв акында маьселе каралганын билдирди. Э.Саитов депутатларга Ногай районынынъ ерли яшавшыларынынъ кызыксынувларын яклав эм эсапка алув негизинде соравды шешуьвдинъ келисли вариантын аьзирлемеге тилек этти. Депутатлар Арсланбек пен Калинин авыллары арасында маьселе айлак та оьткир туратаган ерлерге айырым эс эттилер. Сессияда солай ок, бакша культуралары йыйналган сонъ, сол ерлерде калатаган полиэтилен пленкаларды йыюв акында сорав да коьтерилди. Депутатлар авыл хозяйство ерлерин заманы ман тазалав кереклигин, пленкалардынъ калдыклары топыракка кайдай зарар беруьвин эм маьселеди шешуьвдинъ уйгынлав йолларын ойластылар. Сессияда Бораншы авылдан депутат Мурат Махмузов шыгып соьйледи. Ол авыл яшавшылары атыннан район етекшиси Джамалутдин Эсиргеповка эм Депутатлар йыйынынынъ председатели Алибек Менласановка йолды ярастырув соравын шешуьвде ярдам эткенлери уьшин разылык билдирди. Быйыл язлыкта Кизляр – Терекли-Мектеб – Ставрополь крайынынъ япсары автойолынынъ 92-108-нши шакырым участогында ярастырув ислери юритилген. Соны ман бирге бу йолдынъ бузылган участокларындагы шукырларды ямав эм соларды туьзетуьв куллыклары да оьткерилгенлер. М.Махмузов солай ок, «РСУ» ОР эм СД АО бас специалисти М.Виноградовка, оны ман бирге «Дагестанавтодор» ОР эм СТД начальнигининъ орынбасары Ш.Магомедовка ярастырув куллыкларын уйгынлав эм юритуьв уьшин разылык соьзлерин айтты. Йолды ярастырув ислерди Тагир Тенгизов яшавга шыгарган.