Аявлы ердеслер, газета окувшылары, сыйлы ис йолдаслар! Буьгуьн бизим «Шоьл тавысы» республикалык газетамызга 95 йыл толады. Оьмирге ювык заман – ол тек болжал тувыл, ол – сыдыраларда коьрсетилген савлай халкымыздынъ яны. Бизим газетамыз бетлери бактылар, оьзгерислер, аьдет-йорыклар акында эсти саклайдылар – эм аьр куьн янъы тарих язувды бардырадылар. Ызгы 11 йыл артта мага бу газетады басшылав ман бирге яваплылык тутув борышы да салынды. Газетадынъ аьр номери – савлай коллективтинъ кыйыны эм мынълаган окувшылардынъ сеними. Коьремен мен кайдай уьйкен маьнелиги барын бизим баспаланган макалалардынъ ана тилин саклав уьшин, ясуьйкен несиллердинъ сулыбын яс-несилге коьшируьв уьшин, аьдемлерди бирлестируьв уьшин! 95 йыл… Оьмирге ювык заман «Шоьл тавысы» халкымыз касында барады: уьйкен оьзгерислерде эм куьнле-куьнлер каьрлерде, куванышта эм авыр заманларда. Онынъ бетлеринде – ногайлардынъ тири тарихи, аьдемлер бактылары, биз сакламага тийисли ата-бабалардан калган ийги аьдетйорыклар. Бу заман узагында оьмирлер, технологиялар, форматлар авыстылар, тек бир зат аян сакланды: республикамызда бизим газетамыз дайым да ногай халкынынъ тавысы болды. Биз типография станоклардан баслаганмыз, а буьгуьнде янъы технологиялар оьрленуьв заманында куллык этемиз, ама бизим бас баалык – окувшыларымыздынъ сеними, эм ол технологиялар ман оьлшенмейди. Газета – ол тек янъылыклар тувыл. Ол – йылязба, ол – тил эм маданият мектеби, ол – несиллер йолыгысатаган майдан. Биз, бизим аьдет-йорыклар, туьрли тармакларда ислейтаган кыйыншы аьдемлер, зейинлиги арткан яслар, республикадынъ маьнели оьзгерислери акында макалаларды баспалаймыз эм бу баьри затты биз ана тилинде беремиз, неге десе тил – халк яны. Газетамыздынъ оьткен яратувшылык йолы тыныш болмаса да, бек кызыклы эди. Ызгы он йыл ишинде оьрленуьвлер аз болмадылар. Редакция меканында капиталлы ярастырув, янъы муьлк, коьлик, заманга келисли техника алынган. Газетамыздынъ яратувшылык ис коллективининъ куьш салувы ман «Кадрия», «Алданганлар» эки кесекли документальли кинофильмлери салынганлар. Уьш куллыкшысы Дагестан Республикасынынъ ат казанган маданият куллыкшысы эм журналисти деген сыйлы атка тийисли болганлар… Етимислер аз тувыл, алдыга сенимлер де бар. Армаганда да коьплеген йыллар узагында ана тилинде ер юзине эндирилетаган «Шоьл тавысы» газетасы ногай халкынынъ алал йолавшысы, аьдет-йорыкларды саклавшы эм тавысы болып турсын. 

Эльмира Кожаева, «Шоьл тавысы» республикалык газетасынынъ бас редакторы.