Етекши болув – тыныш борыш тувыл, а балалар бавы ман етекшилев иси – зейинлик, ол тек яваплылыкты тувыл, танъ, суьйип болатаган юректи де талаплайды. Червленные Буруны авылында бизим энъ де аявлы – балаларымыз акында каьр шегуьвге оьз яшавын багыслаган хатынды баьри де биледилер. Ол – РФ Ортак билимлендируьвининъ сыйлы куллыкшысы Арузат Рахметовна Муталимова, мундагы «Кызыл-Гуьл» балалар бавынынъ етекшиси. Уллы орыс педагогы Константин Ушинский язган: «Эгер сиз дурыс сайлаган исинъизге савлай янынъызды берсенъиз, наьсип сизди оьзи табар». Наьсипли тербиялавшы аьдемнинъ коьзине тасланады. Ол балалар арасында яшайды, олардынъ мыратларын сезеди, ата-аналар ман ийги, йылы катнаслар туьзеди. Эне соьйтип Арузат Муталимова да оьзининъ ийги коьнъилин касындагыга коьширеди, балалардынъ яны суьйгенди сезип, олардынъ оьрленуьви, куьнин куванышлы озгарувы уьшин баьри онъайлы аьллер бавда туьзген. А кайдай ийги соьзлер онынъ акында ата-аналар айтадылар! Ол ислеген йыллар неше несил балалар авыстылар. Эндиги онынъ тербияланувшылары оьз балаларын да, эш шексинмей, куллыгына уьйкен яваплылык пан караган, кайратлы Арузат Рахметовнага тапшырадылар. Саьбийлер мен байланыслы яшавы Арузат Муталимовадынъ 1991- нши йыл басланган. Ол Махачкаладагы патшалык педагогикалык институтынынъ мектебке дейим факультетин окып тамамлап, экинши уьйи болган балалар бавына методист болып келеди. А 1998-нши йыл ол заведующий исин бардырып баслайды. Мине йылдан-йылга, басамактан -басамакка ол ислеген балалар бавын энъ де ийгилер сырасына аькеледи. Арузат Муталимова етекшилеген 28 йыл ишинде «Кызыл-Гуьл» балалар бавында ийги якка коьп туьрленислер болган, ол яйнаган еннет муьйисине айланган, янды кувнаган тоьгеректе ярасыклык. Мунда тек коьз куванувга тувыл, келеекте элин суьйген аьдемлер кепленуьвине, мектебке барганша дейим, кызыксынув оты юрегинде янган балалар тербиялавга да уьйкен эс этилинеди. Бавда киши музей орынласкан, мунда Согыс, Ис баьтирлерининъ, терроризм мен куьресте яс янын берген Замир Акмурзаевтинъ, СВО катнасувшыларынынъ муьйислери бар. Соны ман бирге мунда балалардынъ эсинде сакланаяк кызыклы, яркын байрамлар озадылар. Балалар бавынынъ уьстинликли исин онынъ етекшиси савлай ис коллективтинъ етимиси деп санайды. Балалар бавынынъ тербияланувшылары да, тербиялавшылары да туьрли регионаллык эм муниципаллык конкурсларда катнасадылар. Неше де баргылы орынларды бийлегенлер. Солардынъ ызгы йыллардагысын белгилейик. Уьстимиздеги йыл тербияланувшы Сафина Акмурзаева ДР Илми эм билимлендируьв министерствосынынъ 2-нши дережели дипломы ман савгаланган (тербиялавшысы Насият Шоматова), балалар бавына «Мозаика культур, народов и традиций» конкурсын озгарувда эткен коьмеги уьшин Разылык тапшырылган. 2022-нши йыл «Кызыл Гуьл» балалар бавы «Энъ де ийги балалар бавы2021» республикалык конкурсында катнасып, сертификат алган. Арузат Рахметовна ислеген йыллар ДР Илми эм билимлендируьв министерствосынынъ, Ногай район администрация аькимбасынынъ коьплеген Сый грамоталары ман савгаланган. Педагогикалык исине суьйим кыскаяклыдынъ юрегинде кишкей заманда тувган. Ол аьелинде балаларга билим беруьв эм тербиялав исине яшавын багыслаган ялгыз аьдем тувыл. Онынъ эки аьптеси де коьп йыллардан бери окытувшы болып куллык этедилер. Аьелинде Арузат Рахметовнадынъ йолын алганлар да бар, бу куьнлерде онынъ бир кызы Сургут каласында балалар бавында ислейди. – Меним куллыгым – савлай яшавым. Бу йолды сайлаганыма бир де оькинмегенмен, мунда куьн сайын янъыды ашылувлар, ниетлер, а биргелес куллыктан истинъ сырагысы боьтен де ийги болады, – дейди Арузат Рахметовна. Акыйкатлай да, «Кызыл-Гуьл» балалар бавы Арузат Рахметовнадынъ етекшилиги астында аьр бир тербияланувшыга оьзин суьйимли этип сезген экинши уьйи болды. Арувзат Муталимова тек етекшилеп калмайды, ол ис коллективти эм атааналарды биргелес оьрленуьвге даьвлендиреди.

 НУРИЯТ КожаевА. 

 Суьвретте: А.Муталимова.