Кизляр районында ясларды аьскер сырасына йолга салдылар. Казан айдынъ 7-нши куьнинде, аьскерге куьзги шакы-
рув шагы басланувы ман, Кизляр эм Южно-Сухокумск калалары эм Кизляр районы бойынша военкоматында Рос-
сиядынъ Савытлы куьшлер сырасына биринши яслар куьбин шатлыклы аьлде озгардылар. Шарада коррупция аьрекетине карсы соравлары бойынша администрация аькимбасынынъ коьмекшиси Амирхан Даитбегов, военный комиссар Рамазан Курамагомедов, Саратов каладынъ миллет гвардия аьскер институтынынъ ваькили, ямагат биригуьвлердинъ етекшилери, баска болып, аьскерге йолланган яслардынъ кардаш-тувганлары, дослары ортакшыладылар.
Амирхан Даитбегов Кизляр район аькимбасы Аким Микиров атыннан соьз айтты. Ол аьскер службасы – сыйлы борыш эм оьсуьвдинъ маьнели кезеги экенин белгилеп эм ясларга шыдамлыкты, йорыкты тутувды, антына алал
болувды йорады. Оьз соьзинде ол ясларды уьйлеринде кардаш-тувганлары дайым саклайтаганларын эм олар ман
оьктемсийтаганын билдирди. Военком оьз соьзинде келеекте болаяк аьскершилерге согыс аьдетлерин
саклавдынъ маьнелигин эслерине салды эм барган ерде тувган ерин тийисли коьрсеткенлерин йорады.
Яслардынъ кардаш-тувганлары да оларды йолга салувда тынышсызланув эм оьктемсуьв сезимлерине толып,
оларга службасы парахат оьткенлерин, ден савлыкты, аман-эсен тез арада кайтканларын йорадылар. Коьп созылмаган митингтен эм биргелес суьвретке туьсуьвден сонъ, аьскер сырасына кетеек яслар йыйылыс пунктына бардылар, оннан оларды кызмет этеек аьскер боьликлерине уьлестирееклер. Алдыда оларды аьскердеги куьндегиликлери, янъы сулыплары эм шынты йолдаслары саклайдылар.
Суьвретте: шарадан коьринис.