Тарих йолларына эс этип карасак, Куьнбатар Европадынъ эллери бизим патшалыгымызды бурыннан бери тизине шоьктирмеге хаст этип келедилер. Неше кере олар бизим ерлерге шапкынлык этсе де, сол шаклы да «тислери уватылып» кери ызына кайтпага амалсыз болганлар. Аьлиги заманларда да тап солай. Россия Президенти Владимир Путин оьткен айда Петербургта болып озган халклар ара экономикалык форумында сол ок куьнбатар патшалыклары Россияды сансыз санкциялары ман, дав майданында йыкпага шалысса да, «оларда бир зат та бажарылмады» деп белгилеген. Биз буьгуьнлердеги россия аьскершилерининъ дав ериндеги согыс етимислери акында айтсак, сонынъ негизине согыс спецоперациясынынъ катнасувшыларынынъ дуныяда болмас берклиги эм баьтирлиги салынганын белгилемей болмаймыз. Россия Савытлы куьшлери тагы да бир кере сав дуныяга бизим исимиз онъ экенин эм енъуьв бизики болаягын коьрсетеди. Сол себептен бизим явларымыз буьгуьнлерде бизим армиядынъ СВО-ды басламага бир ниети де болмаганын, сол затка украин националистлери куьнали экенин анъламага борышлы, неге десе олар 8 йыл узагында Киевке властьке келген куьниннен алып, Донбасстынъ тынышына яшайтаган калаларын эм авылларын ракеталары ман аткышлап, бир куьнасиз картларды, хатынларды эм балаларды оьлтирип келгенлер. Бизим СВО – олардынъ намарт эм аявсыз террорына карсы явап, соьйтип халкымыз Тувган Элимиздинъ эркинлигин эм ер юзинде яшамага ыхтыярлыгын коршалайды. Аьлиги заманларда да Куьнбатардагы бизим явлар Россия экономика ягыннан осал эл, ога туьртсенъ ок бузылаяк деп ойлайдылар. Болса да олар эндиги де тарих дерислерин, согыс кырларында «бузылган тислерин», оьзлерининъ ата-бабалары элимиздинъ ерлериннен сындырылган аякларын тегаран суьйреп кайтканларын мутадылар. Мутадылар бизим политиклердинъ туьрли ой-ниетлерине эм кызыксынувларына, енъил болмаган экономикалык аьллерине карамастан, Россиядынъ коьпмиллетли халкы уьстине тувган кавыфлык алдында аьр заман да бирлеспеге эм душпанларын бузбага куьш табатаганын. Соны ман бирге олар оьз элин суьетаган эм соны коршалайтаган халкты бир заман да бирев де енъип болмаягын анълап болмайдылар. Сонынъ акында сол ок Куьнбатардагы алдышы акылятаклар, язувшылар, политиклердинъ оьзлери де бир неше кере айтканлар. Согыс спецоперациясынынъ катнасувшылар буьгуьнлерде алдыга барадылар. Сонынъ акында оьз ойын айта келип, Россия Президенти Владимир Путин СВО-дагы ислер акырын кепте кутылув аьсерине янасадылар деп белгилеген. Буьгуьнлерде россия аьскерлери Украина ериндеги БПЛА, ракеталар, топлар эм баска туьрли согыс савытсадагын аьзирлеп шыгаратаган заводларды, соларды тасыйтаган кемелерди, кавга ман байланыслы инфраструктурады атып бузгвнвшлайдылар. Сол соьзлердинъ артында россия аьскершилерининъ оьз Аталыгына алаллыгы эм эрлиги турады. Бизим эсимизден таймайды СВОдынъ кайтип басланганы, сонынъ катнасувшыларынынъ доьрт йылдан артык созылган элимиздинъ келеектегиси уьшин куьреси, алдыга барувдынъ аьр бир метр ерин оьзлерининъ яс янлары ман тоьлеп ян берген бизим ясларымыз… Тувган Элимиз бир заман да оьзининъ увылларынынъ йигитлигин мутпайды эм мутпаяк, неге десе ол Россия еринде болаболганлы яшайтаган баьри халклардынъ йогары байлыгы деп саналады. Бизим элимиздинъ енъилмеслигининъ тагы бир негизи – сонынъ коьп миллетли халкынынъ оьмирлик дослыгы эм тыпаклыгы. Юзлеген йыллар узагында биздеги халкларды ортак бир бакты ман яшав бирлестирип келген. Боьтен де бек патшалыгымыздагы баьри миллетлерди Уллы Аталык согысынынъ авыр сынавлары, согыстан сонъ бузылган авыл-калаларды кайтадан тургызув, элимиздеги уьйкен курылыс ислери бирлестирген деп ойлайман. Соьйтип тыпакласкан халк дуныя юзинде йок болар деп эске келеди. Сол йылларда интернационаллы аьеллер де курылып баслаган. Соны ман россия яшавшыларын ортак бир миллет ян-коьнъил байланысы берк байлаган. Аьлимлер сонынъ доьртевин айырып белгилегенлер: ашык акыл – туьзилген аьлге туьз белгисин беруьв, маьселединъ туьп тамырын коьрип билуьв эм соны шешуьвдинъ аьдеттен баска туьрли йолларын тавып болув. Берк хаьсиет – кыйынлыклар алдында буьгилмеслик эм оьмезлик. шыдамлык – авыр аьллерди коьтерип болув, онъайлы заманнынъ келуьвин куьтип билуьв эм коркув аьлине туьспегенлик. Доьртиншиси: «акыйкатлык» концепциясы. Орыс аьдетлерине коьре, «акыйкатлык» – ол тек фактларга келисуьв тувыл, а йогары дурыслык, эдаплык законы. «Дурыслык уьшин оьлмеге де кыйын тувыл» деген сенимлик фронтта аьскершилерге эм тылда куллыкшыларга куьш берип келген. Ол эдаплык бийиклиги, акыйкатлык исине сенимлик. Сондай яде сога усаган хаьсиет, кылык яде ян куватлык дуныядагы баска халкларда йок эм болмаган.

М-А.Ханов.