Кырк кийик айдынъ 3-нши куьнинде савлай Россия бойынша терроризм мен куьресуьвде макулласув куьни деп белгиленеди. Бу эстеликли куьн терактлардынъ курманлыклары, ямагаттынъ эм патшалыктынъ бас борышы – терроризмге карсы турув кереги акында бизим эсимизге салады. Буьгуьнлерде савлай элимиз бойынша билимлендируьв учреждениелеринде, китапханаларда йигитлик дерислери, класс саьатлери, бу куьнге багысланган шаралар оьтти. Терекли-Мектеб авылынынъ орта кластырылган китапханасында Кадрия атындагы мектебтинъ уьйкен классларынынъ окувшыларынынъ катнасувы ман «Баьримиз биргелесип – терроризмге карсы» шакырувы астында шара озгарылды. Китапхана куллыкшылары шарага Ногай районынынъ прокурорынынъ коьмекшиси Имам Исмаил увылы Алиевти шакырдылар. Китапханадынъ библиографы Наргиза Абдурашева келгенлерди хош алып, савлай дуныяга терроризм кайдай кавыфлыкты тувдыратаганын айтты. Ол 2004-нши йылда Беслан каласында болган кайгылы оьзгерислери акында хабарлады. Сол куьнлерден йырма эки йыл озса да, бизим юреклеримиздеги дертимиз таркамайды. Сонъ соьзди ЦБС директоры Сабират Казгерей кызы Абубекерова алды. Ол сол уьш куьннинъ ишинде аманатка алынган аьдемлери мен болган хабарларды айтты. Кашан да, олар коьрген кыйынлык авыр болса да, ассыз, сувсыз турган уьйкенлер де, саьбийлер де караклардан бир зат та тилемегенлер, сол сынавларды оьткенлер. Н.Абдурашева буьгуьнлерде элимизде болып турган аьллери акында айтты. Бес йылдан бери оьтип туры специальли согыс операциясы. Явлар терактлар этедилер, куьнасиз аьдемлерди оьлтиредилер. Шарада окувшыларга сак, сезгир болмага керек экенин билдиретаган видеороликлер коьрсеттилер. Таныс тувыл аьдемлер мен соьйлемеге, олар биревдинъ картасына акша тасланъыз деп айтса, йибермеге ярамайды. Шексиндиретаган дорба коьрсенъиз, ыхтыяр саклав органларына билдирмеге керек. Кайтип ийги этип балаларга анълатылды олар оьзин сондай аьлде юритпеге кереги акында. Йыйылганлардынъ алдында Ногай районынынъ прокурорынынъ коьмекшиси Имам Алиев шыгып соьйледи. Ол куьндегилик яшавдан кайтип балаларды алдатып, оьзине керекли билдируьвлер террористлер алганы акында мысаллар келтирди, балаларга сезгир болынъыз деди. – Балаларды алдатпага тыныш, сизди бас деп акша ман аьвликтирерлер, сонъ бир ерлерди суьвретке алып йибер деп айтарлар. Олар берген соравларда, биринши караска, бир яманлык та йок, ама сонъ олар сизди коркыстып басларлар. Сондай аьллерде калсанъыз, тийисли службалар ман, ата-ананъыз бан байланыспага керек. Танымайтаган аьдемлерге карталарга акша йиберменъиз, ол зат – бек кавыфлы, – деди прокуратура куллыкшысы. Балаларга, террористлер байланыска шыкса, кайтип оьзин юритуьв акында эскертуьвлер пайладылар. И.Алиев шара катнасувшыларынынъ соравларына явап берди. Окувшылардынъ катнасувы ман озатаган шаралар бек маьнели, неге десе анълатув хабарласувлар коьплеген кыянатлыклардынъ алдын шалмага, саьбийлеримизди дурыс тувыл ислерден сакламага амал береди. Китапханада оьткен шара сол борышты бек ийги этип толтырганына баьримиз де шайыт болдык. Г.Бекмуратова.