Буьгуьнлерде «Шоьл тавысы» газетамыз оьзининъ 95 йыллык мерекесин байрамшылайды. Газетамыздынъ коьпйыллык тарихинде юзлеген аьдемлер оьз яваплы ислери мен атларын дайымга калдырганлар. Баспа органынынъ типографиясында аьлиги компьютерлер авыстырганга дейим де куллык кайнап барган. Типография куллыкшылары оьз коллары ман газетага кетеек текстлерди йыйнап ерлестиргенлер. Олар, юмада 2-3 номерлери уьстинде куллык этип, колларын кара майга батырып, туьннинъ ортасына дейим номерди аьзир эткенлер. Эртенгиси куьн аьзирленген газетады йиберип те экиншиси уьстинде куллык этип барганлар. Соьйтип газетамыздынъ уьйкен тарихинде оьз орынын калдырганларынынъ бириси болады авыл ясуьйкени, коьп йыллар артта «Шоьллик маягы» газетасынынъ редакциясындагы типография боьлигининъ куллыкшысы Эсенбийке Туркменбаева. Басында ак тастары ман Эсенбийке-абай ман олтырып хабарлаймыз. Ол мага оьзининъ яшав йолы акында эсине туьсирип кызыклы хабарлайды. Эсенбийке-абай Терекли-Мектебте коьп йыллар бойы яшап келеди. Ясуьйкен кыскаяклы 1935-нши йылдынъ 13-нши июнинде Нариман авылында Юмагельди эм Мухминаттынъ татым аьелинде тувып тербияланган. Нариман авыл мектебинде билим алган. Ясуьйкен кыскаяклы бактысын Толеген деген яс пан байлайды. Эки ястынъ курган наьсипли аьелинде ызлы-ызыннан ети аьвлетлери тувадылар. Эсенбийке-абай сол заманларда «Шоьллик маягы» газетасынынъ типографиясында наборщица, йыйыстырувшы ис аьрекетин толтырып келди. – Газетады кол ман йыйнап, эртен 8-ден алып туьнги эки саьатке дейим олтырган заманларымыз да коьп болды. Бир кайта биринши май газетадынъ номерин йыйнап аьзирлегенимиз эсимде коьп заманга дейим сакланды. Эрте кетсек, концертке бармага да уьлгиреекпиз, деп кызлар ман мырат эттик. Тек ис йолдасымыз Алиш Аджибаев кыйналып йыйган газетамызды билмей туьсирип тоьгеди. Эм газетады кол ман кайтадан йыйып, биз эртенги доьрт саьатке битирдик. Газетага кол басылмай, бирев де кайтпайтаган эди. Куллыктан кеш кетсек те, эртенги сегизге тагы да иске етемиз. Бизди газетадынъ кезекли номери уьстинде куллык этуьв куьте эди, – деп эскереди Эсенбийке Туркменбаева. Редакцияда Эсенбийке-абай 1970-нши йылларга дейим аьрекет этеди. Оннан сонъ ол райОНО, финанс, КГБ район боьликлери ерлескен меканларды йыйыстырув куллыгы ман каьрлеген. Кайда куллык этсе де, ясуьйкен кыскаяклы оьз ис борышын яваплы толтырып келген. Эсенбийке-абайдынъ яваплы иси уьшин алган Сый грамоталары да аз тувыл. Онынъ хабарын тынълай келип, мен Эсенбийкеабайдынъ яшав йигерлигине, йигитлигине тамаша этпей болмадым. Сондай кишкей, юка келген кыскаяклыга сол кадер куьш кайдан келген экен деген ой да эсиме келди. Кыскаяклыдынъ 48 ясындагы эри авырувдан дуныядан кешеди. Ол бир-бириннен кишкей ети аьвлетлери мен колында ялгыз калады. Сол йыл кенжапай кызы Бариятка ети яс толган эди. Ана олардынъ аьр-бирисин аьдуьвлеп оьстирип яшав йолына онълады. Буьгуьнлерде олардынъ аьр бириси яшавда ерлесип, сайлаган кеспилери бойынша билим алып бактыларын курганлар. Ол буьгуьнлерде кишкей увылы Каирбек эм келини Гульнара ман яшайды. 91 ясындагы куллыксуьер ясуьйкенимиз оьз картлыгын аьзиз аьвлетлери, уныклары эм немерелерининъ тоьгерегинде куьезленип озгарады. Газетамыздынъ бетлеринде озгарган яшавынынъ яслык йыллары, ис йолдаслары, эм авыр йылларында онынъ аьр бир номери уьзилгисиз дуныя ярыгына шыгарылып, окувшыга еткерилуьвде коскан уьлиси ясуьйкеннинъ эсинде мутылмас ярык эстелик болып яшар. Г.Нурдинова. Суьвретте: Э.Туркменбаева.