Театр – яшав суьлдери… Аьр бир спектакль – яшавдынъ бир кезеги. Мунда аьелдинъ, аьдемнинъ бактысы, яшав аьли… Коьп затларды коьрмеге эм анъламага болады, бир спектакльди карап. Ногай халкымызда патшалык театр болганлы 25 йыл да оьтти. Сол йыллар ишинде юзлеген саният асарлары коьрсетилдилер, артистлер саны да, олардынъ кеспилик уьстинликлери де оьсти, Россиядынъ, ювыктагы шет эллердинъ туьрли ерлеринде болып, ногай театр атын, халкымызды таныдылар. Ногай патшалык театрдынъ болувына куьш салган аьдемлер де бар, олардынъ атлары учреждение тарихине кирип калган, сонынъ тарихин туьзуьвшилер аьли де ис аьрекетин белсенли бардырадылар. Ногай патшалык театрынынъ биринши етекшиси эм режиссеры, саният тармагында аты белгили инсан Байсолтан Джумакаев болган эм коьп йыллар узагында олардынъ каьрин шегип турды. Ол театрды етекшилеген заманларында коьп етимислерге етистилер. 25 йыл. Аьдемнинъ яшав оьмири мен тенълестиргенде, яс улан, аьли де куьши де, куваты да бар, кайдай кыйынлыкты да оьтпеге амалы да бар… Тарих пен карайтаган болсак, заьлимдей заман, аякка берк турган, сулып та йыйнаган… Буьгуьн Ногай патшалык театрынынъ етекшиси – ДР ат казанган артисти Гульфия Кокоева. Театрдынъ репертуары бу куьнлерде бек кенъ – балалар уьшин эртегилерден алып тарихли шыгармаларга дейим… Аты да кенънен кенъ бола береди. Ис коллективте талаплы артистлер куьннен-куьнге коьп болады. Ногай патшалык театрынынъ мерекели шарасында Дагестан Республикасынынъ маданият министри де ортакшылык этти. Республикадынъ бас каласыннан келген сыйлы конаклар патшалык театры акында тек ийги соьзлер айттылар. ДР Маданият министрининъ кесек заманга исин юритуьвши Зарема Бутаева ногай патшалык театрынынъ артистлерине, сахнада коьринмейтаган, ама сонынъ болувына салдарлы косым этетаган куллыкшыларга ведомстволык Сый грамоталар ман Разылык хатлар тапшырды. Келген конакларга, театр артистлерине, куллыкшыларына оьзининъ кутлав соьзин Ногай район етекшиси Джамалутдин Эсиргепов айтып кетти, шара барысында кутлав соьзлерин Ногай район еринде аьрекет бардыратаган учреждение етекшилери де шыгып айттылар. Коьплердинъ коьнъилине етти биринши театр етекшиси Байсолтан Джумакаевтинъ соьйлегени. Ол ак юрегиннен каравшыга разылыгын билдирип, театрдынъ биринши алынган абытларын эсине алып, эскеруьвлери мен боьлисти. Ис йыллар… Олар кыйынлы, булытлы, тар сокпаклы, шувак куьнли де боладылар. Ис йолдаслар араларында эрислесуьвлер де болмай болмайды, бир ерлерде оьпкелевлер де болмага болады, сол да яшав… – Мен буьгуьн аьр биринъизден кешируьв тилеймен, оьзим де сизди кеширемен, аьр биринъиздинъ уьстинлигинъизге де суьйинип тураман, алдыда аьр бир артистке тек оьсуьвди, оьрленуьвди йорайман, – деген йылы соьзлери мен, оны сыйлап, сахнага шыккан ис коллективтинъ аьр бирисин куьшаклап шыкты. Ол соьзинде дайым уьйкен маьне берип, Ногай патшалык театрынынъ маьселесине тешкеруьвли караган, дайым коьмегин этип келген ДР маданият министрининъ кесек заманга исин юритуьвшиси Зарема Бутаевага савболсынын да айтты. Шатлыклы шара театр артистлерининъ представлениеси мен бардырылды. Сонда мерекеши театр куллыкшылары ис барысында болатаган маьселелерди, оьзлерининъ йолыгатаган кыйынлыкларын, етиспевликлерди келтирип, куьлкиге айландырдылар. Театр, тагы да бир айтаман, яшав суьлдери. Биз оьзимиздинъ куьнле-куьнлик яшавымызды мунда шеттен коьрмеге амаллымыз, ама сол бизге ойын болып коьринсе де, маьнеси бек уьйкен, сахнада коьргенимизди анализ этип карайтаган болсак, яшавымызда коьп янъылысты айланып кетпеге болар эдик. Ногай патшалык театры, хайырлы мереке болсын, алдыда тек уьстинликлер сизге, сиз бизи мен, биз сизи мен дайым тар байланысымызды уьзбейик. Яшасын Ногай театрымыз. 

Г.Сагиндикова. Суьвретте: савгалав мезгили.