Оьрметли ердеслер!

3-нши сентябрьде Россияда йыл сайын да Терроризм мен куьресте макулласув куьни белгиленеди. Бу эстеликли куьн Беслан калада 2004-нши йылдынъ 1-3-нши сентябрь куьнлеринде, террористлер каладынъ бир мектебин колларына алып, 3 куьн ишинде мынънан артык аьдемлерди аманат кебинде ыслап турган кайгылы оьзгерислер мен тар байланыслы. Теракттынъ сырагысында уьш юзден артык аьдемлер кырылганлар, олардынъ яртысыннан коьбиси – бир куьнасиз балалар. Оннан баскалай, аманат есиринде болган 810 аьдемлер, солардынъ санында ФСБ эм ыхтыяр саклавшы органларынынъ куллыкшылары яраланганлар. Спецназ аьскершилерининъ хыйлы кесеги ян бергенлер – олар оьзлерининъ коькиреклери мен балаларды коршалаганлар.
Бесландагы мектебти террористлер бандасы колларына алган заманнан бери 22 йыл оьтти, ама аьлиге дейим бизим юреклеримиздинъ авырувы, ашувы эм янымыздынъ адалав сезими таймаган. Сондай дуныя коьрмеген ис кайтип болган экен? Оьзлерининъ иблис намарт ниетлерине етисуьв уьшин сондай ийги ярык таза – Билимлер куьнинде балаларга колларын коьтермеге кайтип аьдем деген бармага болады? Бу соравларга яваплар енъил эм, оькинишке, каты.
Терроризм – аьлиги заманнынъ энъ де йырткыш иси, халклар ара кавыфсызлыкка карсы этилинген шакырув. Терроризм – ол аьр бир уьйге аьр бир заман вакытында келмеге болатаган согыс. Сол согыс бир законлар, конвенциялар эм келисуьвлер мен де тыйылмаган. Бу есирлерсиз, ярасувларсыз эм не басы, не ызы коьринмеген согыс. Оьзининъ бас йорыгы этип тынышына яшайтаган аьдемлерге карсы бек уьйкен йойым келтируьв ниети болган согыс.
Террористлердинъ коллары бир эдаплык, юристлик яде дин йорыклары ман да байланыспаган. Олар коьбисинше оьз байыр яшавын каьпикке санамайтаган, баскалардыкын болса оннан да бетер бааламайтаган инсанлар. Террористлерге яхшылык эм яманлык акында аьдем анъламлары келиссиз, неге десе олар оьзлерининъ этетаган аьрекети мен оьз-оьзлерин аьдем саныннан тайдырадылар. Сонынъ уьшин де олар ман куьресуьв амаллары да тап сондай болмага керек. Ким террор йолына туьскен болса, сол аьдем оны гуманизм аьдети бойынша аяв деген сезимге тийисли тувыл.
Биз тек Бесланды тувыл, биз солай ок Буденновскты эм Дубровкады, Буйнакск эм Волгодонскты, Москва метросында эм Волгоград троллейбусында атылувларды, эм янъы замандагы коьп баска террорист ислерин эсимизде тутамыз. Биз мутпаймыз эм кеширмеймиз. Террор ман куьресте ямагат оьз коршалавшылары – ыхтыяр саклавшы органларына эм спецслужбаларга сенимли таяв болмага керек. Террор курманлыкларын дайым да эсимизде саклаймыз! Эндигиден армаган сондай ислерди болдырмаспыз!

Сыйлы район яшавшылары!

Терроризм эм экстремизмнинъ кайдай туьрли ислерине де шетте турып караманъыз! Бизим аьр биримиздинъ саклыгымыз бан бизим яшавымыздынъ, бизим ювыкларымыздынъ эм конъсыларымыздынъ яшавларынынъ кавыфсызлыгы байланыслы. Ямагат ишинде экстремист ниетлерине карсы энъ ийги алдын шалув аьрекети деп баскалардынъ яшав йорыгына, аьдетлерине, динлерине шыдамлы болув эм бир-бирисин оьрметлев, бизим элимиздинъ маданият эм тарих аьдетлерин саклав эм арттырув саналады.

«Ногайский район» МР аькимбасы               Д.Эсиргепов.
«Ногайский район» МР Депутатлар Йыйынынынъ   председатели                                                                                                                                         А.Менласанменласанов.