Кырк кийик айынынъ 18-20-ншы куьнлеринде озган сайлавларда согыс спецоперация катнасувшылары эм олардынъ ата-аналары да белсенли катнастылар. Оьз катнасувы ман олар россия ямагатлыгынынъ бирлигин эм куватын коьрсеттилер. Нариман авылында А.Асанов атындагы мектебинде орынласкан сайлав участогында оьз тавысын СВО ветераны Руслан Абдулбариев берди. Ол Эл алдындагы борышын намыслы толтырган, согыс спецоперация барысында коьрсеткен эрлиги уьшин медальлер мен савгаланган. – Сайлавларда катнасув – ол бизим борыш. Биз элимиздеги маьнели политикалык оьзгерислерге шеттен карап турып болмаймыз. Элимиздинъ бактысы шешилген заманларда, халкымыз бирге болмага тийисли. Мен бизим ортак енъуьвимизди бирге ювыклатпага болаяк аьдемлер, бойсынмаслы эм куватлы Россиядынъ тынышлы келеектегиси уьшин оьз тавысымды бердим, – деди ол. Онынъ тавысы тек кагыттагы белги тувыл, ол – тынышлыктынъ шынты баасын билген аьдемнинъ тавысы. 

НУРИЯТ Кожаева.