Уллы инсанлардынъ бириси айткан: «Баьтир – ер юзинде энъ де кыска кеспи». Ушын соьзлер. Баьтирлик аьдемнинъ юрегинде, янында яшайды, болса да бир кыска заманнынъ ишинде инсан яшавын эли уьшин, тынышлык уьшин курманлык этип, йигитликти коьрсетеди. Эльдар Ирмагомет увылы Саитов Шешен Республикасында Сары Су авылында тувган, СВО ерине оьз эрки мен кетип, явга йигитлерше карсы турып, яс янын берген. Онынъ акында озган заманда айтпага бек кыйын, тек туьнегуьнлерде бизим газетамыздынъ бетлеринде Эльдардынъ согыс йолы акында макала шыккан эди. Оьзи конъысы республикасында тувган болса да, Эльдардынъ яланъаяк балалыгы, яслыгы Ногай районынынъ Кумлы авылында оьтти. Согыс спецоперациясына кетеектен алдын Эльдар Саитов аьели мен Махачкала каласынынъ Сулак поселогында яшайтаган болган. Ол «Ахмат-спецназ» боьлигинде Донецк  республикасында штурмовик болып куллык эткен. Сулыплы аьскерши СВО еринде коьрсеткен баьтирлиги, ийги нызамлыгы уьшин оьз боьлик етекшилевининъ Сый грамотасына эм омырав белгисине тийисли болган. 2025-нши йылдынъ карагыс айынынъ 29-ншы куьнинде Эльдар Саитов оьз йолдаслары ман согыс борышларын толтырмага кетеди. Сол куьннен алып аьскерши кардаштувганлары ман байланыска шыкпаган. Эльдардынъ ювыклары, аьели сеним мен караганлар оны, тек, оькинишке, ердесимиз согыс борышларын толтырув мезгилинде ян берген. Эльдардынъ анасы Кумлы авылында койылган, ызгы кере уьйге келгенде, яс айткан: «эгер мага бир зат болса, анамыздынъ касында коярсыз». Эльдар Саитов Дагестан Республикасынынъ Ногай районынынъ Кумлы авылынынъ оьлигинде коьмилген. Баьрисининъ эсинде де Эльдар Саитов тек ийги эскеруьвлер болып калган. Бирге согыскан тенълери оны йигерли аьскерши деп биледилер. Кардаш-тувганлар оны юреклеринде эм эслеринде дайымларга саклап тураяклар. Увыллары эм кызларына Эльдар Саитов энъ де ювык эм аьзиз аьдем болып калган. 

 Г.Бекмуратова.  Суьвретте: Э.Саитов.