Йыл сайын казан айынынъ 15-нши куьнинде авыл хатын-кызлар байрамы белгиленеди. Бу куьн кайбиримизди авыл еринде яшайтаган хатын-кызларга тийисли маьне бермеге, авылхозяйстволык тармагына олар салган уьлисти бааламага шакырады. Янъыларда Терекли-Мектеб авылындагы орта китапханасында, «Мен – авыл китапханашысы» деп аталып, видеороликлер конкурсы оьтти. Ярыста 15 китапханашылар катнастылар. Сол куьн китапханада шынтылай да ярасык эди. Куьздинъ байлыклары баьриси де йыйналган – ясылшалар, емислер, ябыскан бутаклары, тап оьзи Куьз келгендей байрамга. Конкурс катнасувшылар оьзлери писирген зияпетлерден сыпыра да туьздилер, ошак саклавшылар этип коьрсеттилер оьзлерин. Жюри сырасында Ногай районынынъ Хатын-кызлар советининъ председатели Асият Манкаева, «Яслык» яслар орталыгынынъ специалисти Гульжанат Каракаева, фудблогер, писируьвши Ирина Отарова катнастылар. Конкурс китапханашыларга оьзлерининъ куллыгы, авыл яшавы, олардынъ кесписи кайдай маьнели эм керекли экени акында айтпага амал берди. Видеороликлер туьрли эди – араларында креативли, яслар карасы ман бар эди, баскалары миллет аьдетлерин кулланып, ногайша этилинген. Таза ана тилинде ярасык видеоролик Карасу авылынынъ китапханашысы Асият Тангатарова эткен. Ийги соьзлер Кумлы авылынынъ китапханашысы Рабият Менлиалиевадынъ видеоролиги акында айтпага болады, ол оьзининъ куллыгы акында йылувлык пан хабарлайды, мине отыз йылдан бери ол ислейди китапханада. Маскарашыл видеоролик орта китапханадынъ куллыкшысы Арувзат Шамбилова эткен. Ол китапханада бос орын бар экенин билип, бир-эки йыл ислемеге келеди, ойлайды мунда эткендей куллык йок, китап окып, келгенлерге оларды берип, шай ишип заман йибермеге болаяк. Болса да, бир-эки йыл 17 йылга созылады, ол анълайды, кайдай кыйын китапханашысынынъ куллыгы – шаралар уйгынлав, китаплерди уьндириклерге ерлестируьв, сен – видеограф, сценарист, режиссер эм юритуьвши. Ленинаул авылынынъ китапханашысы Шахфбийке Янбулатова «Эгер китапхана аьдем болган болса» деген видеоролик аьзирлеген, ол китапханады ана, насихатшы, кыймас этип коьрсетеди. Конкурстынъ енъуьвшиси Терекли-Мектебтинъ балалар китапханасынынъ етекшиси Зарема Джумалиева болды. – Баьри роликлер де кызыклы эди. Китапхана куллыкшылары оьзлерин авыл хатыны этип коьрсеттилер, олардынъ уьйи, аьели, шипийтавыгы, малы эм суьйикли кесписи бар. Олардынъ айтувы ман, китапхана – инсанларды билимли этетаган организация. Аьдемлерге ол айырым дуныя, аьлиги заманнынъ инсаны оьзин билимли деп санап болмайды, эгер китаплер окымаса, – деп айтады шара акында Ногай районынынъ орта китапхана тармагынынъ директоры Сабират Казгерей кызы Абубекерова. Баьри катнасувшылар савкатлар ман, номинация бойынша дипломлар ман савгаландылар – «Кеспиге алаллык уьшин» (Рабият Менлиалиева, Кумлы авылы), «Киши Аталыкка суьйим эм патриотизм уьшин» (Гульжана Кульгишиева, ЧервленныеБуруны авылы), «Китапхана – авыл яшавынынъ орталыгы» (Сеперхан Джумагишиева, Орта-Тоьбе авылы), «Энъ де ийги видеоролик» (Зарема Джумалиева, Терекли-Мектеб авылы), «Энъ де ийги авыл блогеркитапханашы» (Арувзат Шамбилова, Терекли-Мектеб авылы), «Этномаданият аьдетлерге алаллык уьшин» (Асият Тангатарова, Карасу авылы), «Энъ де ян йылувлы портрет» (Шахфбийке Янбулатова, Ленинаул авылы), калганлар «Авыл аьдетлерин саклавшылар» номинация бойынша дипломлар алдылар. Шарадынъ спонсорлары Ногай районынынъ Хатын-кызлар совети, Лесхозы, «Яслык» яслар орталыгы болдылар. Фудблогер Ирина Отарова таьтли торт писирип аькелди эм енъуьвши Зарема Джумалиевага тапшырды. Шара даьмли сыпырадынъ тоьгерегинде тамамланды.

  Г.Бекмуратова. Суьвретте: конкурстан сонъ.