Газетамызда эртеректе билдирилгенлей, Кыргызстаннынъ бас каласы Бишкекте болып оьткен Савдуныялык коьшпели халкларынынъ ойынларында Ногай районыннан бизим яс ердеслеримиз: авдарыс спорт кеби бойынша Россиядынъ йыйылыс командасынынъ бас тренери Кемалуддин Нурлубаев, Тангатар Курманакаев, Альмир Апазов эм Исмаил Амангельдиев ортакшылык этип, ез медальлерин алып келдилер. Авдарыс – ол атлар уьстинде куьрес, бурынгы ногай халкынынъ кызыклы спорт ярысларынынъ бириси. Бу ойынды яшавга муннан бир-эки йыллар артта яслар кайтардылар. Бу спорт кеби солай ок Россия еринде бизге кардаш халклары: татарларда, башкирлерде, якутларда да кенъ белгили эм олар йыл сайын да авдарыс ойыны бойынша Россия чемпионатында катнасадылар. Быйылгы Россия чемпионаты Ногай районынынъ Куьнбатар авылындагы А.Э.Зекашев атындагы ипподромында май айында болып оьтти. Сонынъ енъуьвшилери болган спортсменлер Россиядынъ йыйылыс командасына кирмеге керек эдилер. Элимиздинъ быйылгы чемпионатынынъ сырагысында 6 аьдем алдышы орынларды алдылар эм олардан авдарыс ойыны бойынша Россиядынъ йыйылыс командасы туьзилди. Сонынъ ишине бизим ногайлардан: Кара-Сув авылыннан – Тангатар Курманакаев, Червленные Буруныдан – Альмир Апазов (ол команда ишинде энъ де яс спортсмен, 18 ясында) эм Ставрополь крайынынъ Нефтекум районынынъ Коясыл авылыннан Исмаил Амангельдиев кирдилер. Командадынъ бас тренери этилинип Кемалуддин Нурлубаев беркитилди. Бу яс ердесимиз ногай еримизге аталарымыздынъ авдарыс деген мутылган спорт кебин кайтармага уьйкен кыйын салган. Кемалуддин авдарыс спорт ярысы ман 2019-ншы йылдан алып, Ногай районынынъ 90 йыллык байрам куьниннен бери каьр шегип баслаган. Оны авдарыс бойынша Россиядынъ йыйылыс командасынынъ бас тренери этип Россия Федерациясынынъ спорттынъ миллет кеплери бойынша комитети беркиткен. Ол онынъ эм бизим халкымыз уьшин уьйкен сый эм куьез болады. Кемалуддин Нурлубаевтинъ уйгынлавы ман Ногай районында авдарыс бойынша 20 турнирлер оьткерилген, 5 кере ногай яслары Татарстанда, Башкортостанда Савлайроссиялык турнирлеринде катнаскан, 2 кере – Татарстанда оьткерилген дуныя чемпионатында. Командадынъ сондай йогары дережели спорт ярысларында катнасувына Москвадагы ногай ямагаты, «Кунбатар» атлар клубы, «Экопрод» ООО, «сельсовет Коктюбинский» СП МО аькимбасы Замир Суюндиков, Ставрополь крайынынъ Степной районынынъ Иргаклы авылынынъ активистлери, Кара-Сув авылдан фермер Оразманбет Копиев эм баска аьдемлер спонсорлык ярдамын эткенлер. Быйыл Ногай районынынъ командасы Казахстандагы Актоьбе область Госдумасынынъ депутаты Фархад Сансызбаевтинъ шакырувы ман сонда болып келген. Кыргызстан элинде бизим ногай спортсменлерге йолыгыска сонда яшайтаган ногайлар келгенлер. Соннан кайтканда, Ногай районы еринде спортсменлерди йолыгувды Терекли-Мектеб авыл аькимбасы Марат Кулунчаков уйгынлады. Сол куьн Тангатар Курманакаевке авылдаслары ийги тукымлы тайды эм атка салатаган янъы иерди савга этип тапшырдылар. Оьзге яс спортсменлеримизге де йолыгыс куьн баалы савгалар берилген. Аталарымыздынъ атлар уьстиндеги бурынгы авдарыс ойынын халкымызга кайтарганы уьшин Кемалуддинге эм баска ясларымызга разылыкты билдиремиз. Олардынъ биринши кере сондай бийик дережели спорт ярысларында катнасып, сондай уьстинликке етисуьви аз зат тувыл. Ясларымызга соннан да уьйкен спорт етимислерди йораймыз.

 М.Ханов.

 Суьвретте: Кемалуддин Нурлубаев.